മഞ്ഞലയിൽ മുങ്ങി കുവൈത്ത്​ 

കുവൈത്ത് സിറ്റി: മഞ്ഞലയിൽ മുങ്ങിത്തോർത്തിയപോലെ സുന്ദരിയായിരിക്കുന്നു കുവൈത്തിലെ വഫ്​റയും അബ്​ദലിയും. ‘അൽ ബർഹി അൽ അസ്​ഫർ’ എന്ന കുവൈത്തി​െൻറ സ്വന്തം ഈന്തപ്പനകളാണ്​ മരുപ്രദേശത്തെ മൊഞ്ചണിയിച്ചത്​. വിദഗ്ധനായ ഒരു കലാകാരൻ ചായം പൂശിയപോലെ മനോഹരമാണ്​ ഈന്തപ്പന കുലകളിൽ റുതബ് പാകമായി കിടക്കുന്നത്. മറ്റു ഈത്തപ്പഴങ്ങളെ അപേക്ഷിച്ച് കടുത്ത മഞ്ഞനിറമായിരിക്കും റുതബ് കാലത്ത് ഈ ഈത്തപ്പഴങ്ങൾക്ക് എന്നതുകൊണ്ടാണ് ഇതിന് മഞ്ഞനിറം എന്ന അർഥത്തിലുള്ള ‘അൽ ബർഹി അൽ അസ്​ഫർ’ എന്ന പേരുലഭിച്ചത്. 

മറ്റ് അറബ് രാജ്യങ്ങളിലേതുപോലെ വിവിധതരം ഈന്തപ്പനകൾ കുവൈത്തിലുണ്ടെങ്കിലും  ചിലതെല്ലാം പേരിന് മാത്രം കായ്ക്കുകയും വിളവെടുപ്പ് നടക്കുന്നവയുമാണ്. എന്നാൽ, മഞ്ഞ ബർഹിയുടെ സ്​ഥിതി വ്യത്യസ്​തമാണ്. രാജ്യത്തി​െൻറ ആവശ്യത്തിനനുസരിച്ചുള്ള വിളവ് ലഭിക്കുന്നതിൽ ബർഹി തോട്ടങ്ങൾ ഇതുവരെ ചതിച്ചിട്ടില്ലെന്ന് വഫ്റയിലെ കർഷകർ സാക്ഷ്യപ്പെടുത്തുന്നു. 

രാജ്യത്തി​െൻറ കാർഷിക മേഖലയായി അറിയപ്പെടുന്ന വഫ്റയിലും അബ്​ദലിയിലുമാണ് അൽ ബർഹി അൽ അസ്​ഫർ കൂടുതൽ വിളയുന്നത്. അബ്​ദലിയിലെയും വഫ്റയിലെയും കാർഷിക മേഖലകളിലൂടെ ഈ സീസണിൽ വാഹനമോടിക്കുകയോ നടന്നുപോവുകയോ ചെയ്യുകയാണെങ്കിൽ മഞ്ഞച്ചായം കോരിയൊഴിച്ചതുപോലെയുള്ള ഈന്തപ്പന മരങ്ങളായിരിക്കും കണ്ണിൽപ്പെടുക. 

എല്ലാ വർഷവും ആഗസ്​റ്റ് മാസത്തി​െൻറ തുടക്കത്തോടെയാണ്  റുതബി​െൻറ വിളവ് കാലം ആരംഭിക്കുന്നത്. കാഴ്ചഭംഗിയോടൊപ്പം രൂചിയിലും കേമനാണ്​ ബർഹി. കടുത്ത മധുരവും  കറുമുറു ശബ്​ദവും ഈ ഇനത്തി​െൻറ പ്രത്യേകതയാണ്. കൂടുതൽ പഴുത്ത് ഈത്തപ്പഴമായി കഴിക്കുന്നതിനേക്കാൾ ഇതി​െൻറ റുതബ് കഴിക്കാനാണ് സ്വദേശികളും വിദേശികളും ഏറെ ഇഷ്​ടപ്പെടുന്നത്​. കുവൈത്തുൾപ്പെടെ അറബ് മേഖല ഈന്തപ്പനകളുടെ വൈവിധ്യം കൊണ്ട് പ്രശസ്​തമാണെങ്കിലും രാജ്യത്തി​െൻറ സ്വന്തം ഈന്തപ്പന എന്ന പേരിൽ പ്രസിദ്ധമായത് ‘അൽ ബർഹി അൽ അസ്​ഫർ’ തന്നെയാണ്.