കുവൈത്തിൽ സ്വകാര്യ മേഖല ജീവനക്കാരുടെ ശമ്പളം: തീരുമാനം വൈകാതെ -മന്ത്രി

കുവൈത്ത്​ സിറ്റി: സ്വകാര്യ മേഖലയിലെ ജീവനക്കാരുടെ ശമ്പളവുമായി ബന്ധപ്പെട്ട്​ സർക്കാർ തീരുമാനം വൈകാതെയുണ്ടാവുമെന്ന്​ സാമൂഹിക ക്ഷേമ മന്ത്രി മറിയം അഖീൽ പറഞ്ഞു. സ്വകാര്യ മേഖലയിലെ നിരവധി തൊഴിലാളികൾ ശമ്പളം ലഭിക്കാതെ പ്രയാസപ്പെടുന്നതായി അറിയാം.

വരുമാനമില്ലാതെ ഇവർക്ക്​ ജീവിതം മുന്നോട്ടുകൊണ്ടുപോവാൻ കഴിയില്ല. കൊറോണ വൈറസ്​ പ്രതിരോധ നടപടികളുടെ ഭാഗമായി കടകൾ അടച്ചിടാൻ നിർദേശിച്ചതും ജനങ്ങളോട്​ വീട്ടിലിരിക്കാൻ ആവശ്യപ്പെട്ടതും വാണിജ്യ മേഖലയെ തളർത്തിയിട്ടുണ്ട്​.

എന്നാൽ, ശമ്പളം ലഭിക്കാതെ തൊഴിലാളികൾക്ക്​ ദീർഘകാലം മുന്നോട്ടുപോവാൻ കഴിയില്ലെന്നിരിക്കെ ഇതുസംബന്ധിച്ച സർക്കാർ തീരുമാനം വൈകാതെ ഉണ്ടാവുമെന്ന്​ മ​ന്ത്രി മറിയം അഖീൽ കുവൈത്ത്​ ടി.വിയുമായി നടത്തിയ അഭിമുഖത്തിൽ കൂട്ടിച്ചേർത്തു. ശമ്പളം നൽകാൻ തൊഴിലുടമകളോട്​ ഉത്തരവിടുകയോ മന്ത്രാലയത്തിലെ ഗ്യാരൻറി തുകയിൽനിന്ന്​ വേതനം നൽകുകയോ ആണ്​ സർക്കാറിന്​ മുന്നിലുള്ള വഴി.

ലോകത്തെല്ലായിടത്തുമെന്നപോലെ കുവൈത്തിലും വാണിജ്യ മേഖല വൻ പ്രതിസന്ധി നേരിടുന്നുണ്ട്​. ചെറുകിട സ്ഥാപനങ്ങളാണ്​ ഏറെ പ്രയാസപ്പെടുന്നത്​.