2016ലെ അറബ് ശ്രേഷ്ഠ വനിതാ പുരസ്കാരം ശൈഖ ഹിസ്സ അല്‍ സഅദിന്

കുവൈത്ത് സിറ്റി: കഴിഞ്ഞ വര്‍ഷത്തെ ശ്രേഷ്ഠ  അറബ് വനിതാ പുരസ്കാരത്തിന് കുവൈത്ത് രാജ കുടുംബത്തിലെ ശൈഖ ഹിസ്സ അല്‍ സഅദ് തെരഞ്ഞെടുക്കപ്പെട്ടു. അറബ് രാജ്യങ്ങള്‍ക്കിടയില്‍ ടൂറിസം വികസനവുമായി ബന്ധപ്പെട്ട് ചെയ്ത വിവിധ സംഭാവനകളാണ് ശൈഖ ഹിസ്സയെ ഈ സ്ഥാനത്തിന് അര്‍ഹയാക്കിയത്. അന്തരിച്ച പിതൃ അമീര്‍ ശൈഖ് സഅദ് അല്‍ അബ്ദുല്ല അസ്സബാഹിന്‍െറ മകളാണ് ശൈഖ ഹിസ്സ. കഴിഞ്ഞദിവസം ഈജിപ്തിലെ ശറമുശൈഖില്‍ നടന്ന ചടങ്ങില്‍ അവര്‍ പുരസ്കാരം ഏറ്റുവാങ്ങി. തന്‍െറ ഈ അംഗീകാരം അമീര്‍ ശൈഖ് സബാഹ് അല്‍ അഹ്മദ് അല്‍ ജാബിര്‍ അസ്സബാഹിനും കിരീടാവകാശി ശൈഖ് നവാഫ് അല്‍ അഹ്മദ് അല്‍ ജാബിര്‍ അസ്സബാഹിനും സമര്‍പ്പിക്കുന്നതായി ഹിസ്സ സഅദ് പറഞ്ഞു.