വീടുകൾക്ക് മുന്നിൽ ശൈത്യകാല ടെൻറുകൾ പണിയുന്നതിന് നിബന്ധനയോടെ അനുമതി

കുവൈത്ത്​ സിറ്റി: സ്വദേശികൾക്ക് വീടുകൾക്ക് മുന്നിൽ ശൈത്യകാല ട​​െൻറുകൾ പണിയുന്നതിന് മുനിസിപ്പൽ അനുമതി. മുബാറകിയയിൽ അധ്യാപകരെ ആദരിക്കുന്നതിനുമായി ബന്ധപ്പെട്ട് നടന്ന ചടങ്ങിൽ സംസാരിക്കവെ കുവൈത്ത്​ മുനിസിപ്പാലിറ്റി ജനറൽ ഡയറക്ടർ എൻജി. അഹ്മദ് അൽ മൻഫൂഹിയാണ് ഇക്കാര്യം വ്യക്തമാക്കിയത്. തണുപ്പ് കാലത്തേക്ക്​ മാത്രമാണ് അനുമതി​. വീടുകൾക്ക് മുന്നിലെ ശൈത്യകാല ട​​െൻറുകൾക്ക് പ്രത്യേക അനുമതി വേണ്ടതില്ല. അതേസമയം, കാൽനടക്കാരെ ബുദ്ധിമുട്ടിക്കാത്ത നിലയിലായിരിക്കുക, അയൽവാസിക്ക് പ്രയാസമില്ലാതിരിക്കുക തുടങ്ങിയ നിബന്ധനകൾ പാലിച്ചിരിക്കണം. ഇത്തരത്തിൽ വല്ല പരാതിയും ഉണ്ടായാൽ ട​​െൻറ് നീക്കം ചെയ്യാൻ വീട്ടുടമ ബാധ്യസ്​ഥനാണ്. 
അതിനിടെ, അനധികൃത ട​​െൻറുടമകൾക്ക് 5000 ദീനാർവരെ പിഴ ഈടാക്കുമെന്ന്​ മുനിസിപ്പൽ ഡയറക്ടർ ആവർത്തിച്ചു. ഇത്തരം ട​​െൻറുകൾ പൊളിച്ചുമാറ്റുന്ന പ്രവർത്തികൾ പതിവുപോലെ നടക്കും. നിയമലംഘനങ്ങൾ കണ്ടെത്തുന്നതിന് രാജ്യ വ്യാപകമായി ക്യമ്പിങ്​ മേഖലയിൽ റെയഡ് ശക്തമാക്കുമെന്നും മൻഫൂഹി കൂട്ടിച്ചേർത്തു. 
സാധാരണ ഗതിയിൽ വീടുകൾക്ക് മുമ്പിൽ ട​​െൻറുകൾ സ്​ഥാപിക്കുന്നതും നിലനിർത്തുന്നതും നിയമലംഘനമാണെന്നും അദ്ദേഹം വ്യക്തമാക്കി. കഴിഞ്ഞ വർഷംവരെ ഏത് സാഹചര്യത്തിലായാലും വീടുകൾക്ക് സമീപം ട​​െൻറുകൾ പണിയുന്നത് നിയമലംഘനമായാണ് കണക്കാക്കിയിരുന്നത്. ഇത്തവണ ശൈത്യകാലത്തേക്ക്​ ഇളവ്​ നൽകുകയായിരുന്നു.