കുവൈത്തിൽ വിദേശികളെ നാടുകടത്താനുള്ള ചെലവ്​ വിസക്കച്ചവടക്കാരിൽനിന്ന്​ ഇൗടാക്കും -മന്ത്രി

കുവൈത്ത്​ സിറ്റി: നിയമം ലംഘിച്ച്​ താമസിക്കുന്ന വിദേശികളെ നാടുകടത്താനുള്ള ചെലവ്​ വിസക്കച്ചവടക്കാരിൽനിന്ന്​ ഇൗടാക്കുമെന്ന്​ തൊഴിൽ, സാമൂഹിക ക്ഷേമ മന്ത്രി മറിയം അഖീൽ പറഞ്ഞു. പണം വാങ്ങി വിസ നൽകി വിദേശ തൊഴിലാളികളെ ചതിയിൽ പെടുത്തുന്ന വിസക്കച്ചവടക്കാരെ വെറുതെ വിടില്ല.

പിടിയിലാവുന്ന തൊഴിലാളികളെ താമസിപ്പിക്കാനും നാടുകടത്താന ുമുള്ള ചെലവ്​ വിസക്കച്ചവടം നടത്തുന്ന വ്യക്​തികളിൽനിന്നും സംഘങ്ങളിൽനിന്നും ഇൗടാക്കും. തൊഴിലാളികളെ വഞ്ചിക്കുന്ന കമ്പനി അധികൃതർക്കെതിരെ ക്രിമിനൽ നിയമപ്രകാരം കേസെടുക്കും.

കുറ്റക്കാരെന്ന്​ കണ്ടാൽ ശക്​തമായ നടപടി സ്വീകരിക്കുകയും ചെയ്യും. അനീതിക്കും കുറ്റകൃത്യത്തിനുമെതിരെ സ്വദേശികളും വിദേശികളും ഒരുമിച്ച്​ നിൽക്കണമെന്ന്​ മന്ത്രി മറിയം അഖീൽ കൂട്ടിച്ചേർത്തു.

മനുഷ്യക്കടത്ത്​ ദേശസുരക്ഷയുമായി ബന്ധപ്പെട്ട കുറ്റമാണെന്ന്​ ആഭ്യന്തര മന്ത്രി അനസ്​ അൽ സാലിഹ്​ കഴിഞ്ഞ ദിവസം വ്യക്​തമാക്കിയിരുന്നു. വിസക്കച്ചവടക്കാരുടെയും മനുഷ്യക്കടത്തുകാരുടെയും വിവരശേഖരണത്തിന്​ പ്രത്യേക സംഘത്തെ രൂപവത്​കരിച്ചിട്ടുണ്ട്​.

വിസക്കച്ചവടക്കാരുടെ കെണിയിൽപെട്ട്​ പ്രയാസത്തിലായ തൊഴിലാളികളോട്​ അനുഭാവപൂർവമായ സമീപനമാണ്​ സർക്കാർ സ്വീകരിക്കുന്നത്​. സർക്കാർ യാത്രാചെലവ്​ വഹിച്ചാണ്​ താമസ നിയമലംഘനത്തി​​െൻറ പിഴ ഒഴിവാക്കി കൊടുത്ത്​ ഇത്തരം തൊഴിലാളികളെ പൊതുമാപ്പ്​ നൽകി നാട്ടിലയക്കുന്നത്​. ഇവർക്ക്​ പുതിയ വിസയിൽ കുവൈത്തിലേക്ക്​ തിരിച്ചുവരാൻ അനുമതിയും നൽകുന്നു.

അതേസമയം, ഇവരെ കുരുക്കിയ സ്​പോൺസർമാ​ർക്കെതിരെയാണ്​ നടപടി വരാൻ പോവുന്നത്​. പൊതുമാപ്പിൽ തിരിച്ചുപോവുന്നവരുടെ സ്​പോൺസർമാരുടെ പട്ടിക തയാറാക്കാൻ ആഭ്യന്തര മന്ത്രി നിർദേശിച്ചിട്ടുണ്ട്​. വിസക്കച്ചവടക്കാരെ കണ്ടുപിടിക്കാനാണ്​ ഇത്​. വിസക്കച്ചവടം ഇനി അനുവദിക്കില്ലെന്നും ഇത്തരക്കാർക്കെതിരെ ശക്​തമായ നടപടിയെടുക്കുമെന്നുമാണ്​ അധികൃതർ വ്യക്​തമാക്കുന്നത്​.