തോമസ് കെ. തോമസ് എം.എൽ.എക്ക് സ്വീകരണം നൽകി

കുവൈത്ത് സിറ്റി: കുവൈത്ത് കുട്ടനാട് അസോസിയേഷൻ രക്ഷാധികാരി തോമസ് കെ. തോമസ് എം.എൽ.എക്ക് അസോസിയേഷൻ സ്വീകരണം നൽകി. അബ്ബസിയ ഹൈഡയിൻ ഓഡിറ്റോറിയത്തിൽ നടന്ന ചടങ്ങിൽ സെക്രട്ടറി റോയ് ചെറിയാൻ സ്വാഗതം പറഞ്ഞു. ഫാ. തോമസ് ജേക്കബ് ആഞ്ഞിലിമൂട്ടിൽ ആശംസപ്രസംഗം നടത്തി. എം.എൽ.എയെ ട്രഷറർ കുഞ്ഞച്ചൻ ആന്റണി വടയാറ്റുചിറയിൽ പൊന്നാടയണിയിച്ചു.

കുട്ടനാട്ടിലെ വിവിധ പ്രശ്നങ്ങൾ പരിഹരിക്കാൻ നടപടി ആരംഭിച്ചതായി എം.എൽ.എ മറുപടിപ്രസംഗത്തിനിടെ സൂചിപ്പിച്ചു. എം.എൽ.എയുടെ എല്ലാ നല്ല പ്രവർത്തനത്തിനും കുവൈത്ത് കുട്ടനാട് അസോസിയേഷൻ പിന്തുണ അറിയിച്ചു.