സിറിയയിൽ വെടിനിർത്തൽ ആവശ്യപ്പെട്ട് വീണ്ടും കുവൈത്ത്

കുവൈത്ത് സിറ്റി: നിരപരാധികളായ പൗരൻമാർക്കെതിരെ ആക്രമണം രൂക്ഷമായ സിറിയയിൽ അടിയന്തരമായി വെടിനിർത്തൽ ആവശ്യപ്പെട്ട് കുവൈത്ത് വീണ്ടും രംഗത്തുവന്നു. സിറിയൻ വിഷയത്തിൽ കഴിഞ്ഞദിവസം യു.എൻ സുരക്ഷാ കൗൺസിലിൽ നടന്ന ചർച്ചയിൽ കുവൈത്ത് പ്രതിനിധി ബദർ അബ്​ദുല്ല അൽ മുനീഖ് ആണ് ഇക്കാര്യം ആവശ്യപ്പെട്ടത്. എല്ലാ അന്താരാഷ്​ട്ര മര്യാദകളും കാറ്റിൽപറത്തി സിവിലിയൻമാർക്കെതിരെ രാസായുധമടക്കം പ്രയോഗിക്കുകയാണ് ബശ്ശാർ സൈന്യം. ഓരോ ആക്രമണങ്ങളിലും നൂറുകണക്കിനുപേർ കൊല്ലപ്പെടുകയും ആയിരങ്ങൾ പരിക്കേറ്റ് ദുരിതത്തിലാകുകയും ചെയ്യുന്ന കാഴ്ചയാണ് അവിടെ. കൊല്ലപ്പെട്ടവരെ സംസ്​കരിക്കാനോ പരിക്കേറ്റവർക്ക് ചികിത്സ ലഭ്യമാക്കാനോ സന്നദ്ധ സംഘങ്ങൾക്ക് പോലും സാധിക്കുന്നില്ല. ഈ സാഹചര്യത്തിൽ ദുരിതബാധിതർക്ക് മാനുഷിക സഹായമെത്തിക്കാൻ സിറിയയിൽ ചുരുങ്ങിയത് ഒരു മാസത്തെ വെടിനിർത്തൽ പ്രഖ്യാപിക്കണമെന്നും കുവൈത്ത് ആവശ്യപ്പെട്ടു.