ഡോ​ക്​​ട​ർ​മാ​ർ​ക്കെ​തി​രെ അ​തി​ക്ര​മം: നി​യ​മ​ന​ട​പ​ടി​യു​മാ​യി കു​വൈ​ത്ത്​ മെ​ഡി​ക്ക​ൽ അ​സോ​സി​യേ​ഷ​ൻ

കു​വൈ​ത്ത്​ സി​റ്റി: ഡോ​ക്​​ട​ർ​മാ​ർ ഉ​ൾ​പ്പെ​ടെ ആ​രോ​ഗ്യ പ്ര​വ​ർ​ത്ത​ക​ർ​ക്കെ​തി​രാ​യ അ​തി​​ക്ര​മം ആ​വ​ർ​ത്തി​ക്കു​ന്ന സാ​ഹ​ച​ര്യ​ത്തി​ൽ നി​യ​മ​ന​ട​പ​ടി​യു​മാ​യി കു​വൈ​ത്ത്​ മെ​ഡി​ക്ക​ൽ അ​സോ​സി​യേ​ഷ​ൻ.

നാ​ല്​ കേ​സു​ക​ളാ​ണ്​ സം​ഘ​ട​ന ഇ​തു​മാ​യി ബ​ന്ധ​പ്പെ​ട്ട്​ സ​മ​ർ​പ്പി​ച്ചി​ട്ടു​ള്ള​തെ​ന്ന്​ പ്ര​സി​ഡ​ൻ​റ്​ ഡോ. ​അ​ഹ്​​മ​ദ്​ അ​ൽ ഇ​നീ​സി പ​റ​ഞ്ഞു. തെ​റ്റാ​യ വി​വ​ര​ങ്ങ​ളു​ടെ​യും ഉൗ​ഹാ​പോ​ഹ​ങ്ങ​ളു​ടെ​യും അ​ടി​സ്ഥാ​ന​ത്തി​ൽ ആ​രോ​ഗ്യ പ്ര​വ​ർ​ത്ത​ക​രു​ടെ അ​ന്ത​സ്സ്​ മാ​നി​ക്കാ​തെ പെ​രു​മാ​റു​ന്ന​ത്​ അം​ഗീ​ക​രി​ക്കാ​നാ​കി​ല്ലെ​ന്ന്​ അ​ദ്ദേ​ഹം കൂ​ട്ടി​ച്ചേ​ർ​ത്തു.

മ​ഹാ​മാ​രി​യെ നേ​രി​ടു​ന്ന​തി​െൻറ ഭാ​ഗ​മാ​യി ജീ​വ​ൻ​പോ​ലും പ​ണ​യം​വെ​ച്ച്​ ത്യാ​ഗ​മ​ന​സ്സോ​ടെ പ്ര​വ​ർ​ത്തി​ക്കു​ന്ന ആ​രോ​ഗ്യ​ജീ​വ​ന​ക്കാ​രോ​ട്​ മാ​ന്യ​മാ​യി പെ​രു​മാ​റ​ണം.

ഇ​ത്​ ഉ​റ​പ്പാ​ക്കാ​നു​ള്ള ഉ​ത്ത​ര​വാ​ദി​ത്തം പൊ​തു​സ​മൂ​ഹ​ത്തി​നു​ണ്ട്. കോ​വി​ഡു​മാ​യി ബ​ന്ധ​പ്പെ​ട്ട വി​വ​ര​ങ്ങ​ളെ​ല്ലാം ആ​രോ​ഗ്യ മ​ന്ത്രാ​ല​യം സു​താ​ര്യ​മാ​യി എ​ല്ലാ​വ​ർ​ക്കും ല​ഭ്യ​മാ​ക്കു​ന്നു​ണ്ട്.

ഉൗ​ഹാ​പോ​ഹ​ങ്ങ​ളെ അ​ടി​സ്ഥാ​ന​മാ​ക്കേ​ണ്ട ഒ​രു ആ​വ​ശ്യ​വു​മി​ല്ലെ​ന്ന്​ ഡോ. ​അ​ഹ്​​മ​ദ്​ അ​ൽ ഇ​നീ​സി പ​റ​ഞ്ഞു. ഡോ​ക്​​ട​ർ​മാ​ർ​ക്കും ആ​രോ​ഗ്യ ജീ​വ​ന​ക്കാ​ർ​ക്കു​മെ​തി​രാ​യ അ​തി​ക്ര​മ​ങ്ങ​ൾ ആ​വ​ർ​ത്തി​ക്കു​ന്ന പ​ശ്ചാ​ത്ത​ല​ത്തി​ൽ ഇ​തി​ന്​ ത​ട​യി​ടാ​ൻ ക​ർ​ശ​ന ശി​ക്ഷ ഉ​റ​പ്പു​വ​രു​ത്തു​ന്ന നി​യ​മ​നി​ർ​മാ​ണം ന​ട​ത്ത​ണ​മെ​ന്നാ​ണ്​ ആ​രോ​ഗ്യ പ്ര​വ​ർ​ത്ത​ക​രു​ടെ​ ആ​വ​ശ്യം.

ആ​ശു​പ​ത്രി​ക​ളി​ൽ മ​തി​യാ​യ സു​ര​ക്ഷ ഉ​ദ്യോ​ഗ​സ്ഥ​രെ നി​യ​മി​ക്ക​ണ​മെ​ന്ന്​ ആ​രോ​ഗ്യ മ​ന്ത്രാ​ല​യം ആ​ഭ്യ​ന്ത​ര മ​ന്ത്രാ​ല​യ​ത്തോ​ട്​ ആ​വ​ശ്യ​പ്പെ​ട്ടി​ട്ടു​ണ്ട്. റി​സ​പ്​​ഷ​ൻ ഭാ​ഗ​ത്താ​ണ്​ അ​ധി​കം അ​തി​ക്ര​മ​ങ്ങ​ളും ഉ​ണ്ടാ​കു​ന്ന​ത്. ഇ​വി​ടെ കൂ​ടു​ത​ൽ സു​ര​ക്ഷ ഉ​ദ്യോ​ഗ​സ്ഥ​രെ നി​യ​മി​ക്ക​ണ​മെ​ന്നാ​ണ്​ ആ​രോ​ഗ്യ വ​കു​പ്പി​െൻറ ആ​വ​ശ്യം.

അ​തേ​സ​മ​യം, ഒാ​രോ ഡോ​ക്​​ട​ർ​മാ​രു​ടെ​യും കാ​ബി​ന്​ മു​ന്നി​ൽ സു​ര​ക്ഷ ഉ​ദ്യോ​ഗ​സ്ഥ​രെ നി​യ​മി​ക്കു​ന്ന​ത്​ പ്രാ​യോ​ഗി​ക​മ​ല്ലെ​ന്നും നി​യ​മ​നി​ർ​മാ​ണ​ത്തി​ലൂ​ടെ ശി​ക്ഷ ക​ടു​പ്പി​ക്കു​ക​യും ന​ട​പ​ടി​ക​ൾ ശ​ക്​​ത​മാ​ക്കു​ക​യു​മാ​ണ്​ പ​രി​ഹാ​ര​മെ​ന്നു​മാ​ണ്​ ആ​ഭ്യ​ന്ത​ര മ​ന്ത്രാ​ല​യ​ത്തി​െൻറ നി​ല​പാ​ട്.

രോ​ഗി​ക​ളും കൂ​ടെ എ​ത്തു​ന്ന​വ​രും ചെ​റി​യ കാ​ര​ണ​ങ്ങ​ൾ​ക്കും അ​കാ​ര​ണ​മാ​യും പ്ര​കോ​പി​ത​രാ​വു​ക​യും കൈ​യേ​റ്റ​ത്തി​ന്​ മു​തി​രു​ക​യും ചെ​യ്യു​ന്ന​ത്​ ആ​വ​ർ​ത്തി​ക്കു​ക​യാ​ണ്.