കമ്പനികളുടെ നിയമലംഘനം: തൊഴിലാളികളെ നാടുകടത്തുമെന്ന്​ മുന്നറിയിപ്പ്​

കുവൈത്ത്​ സിറ്റി: നിയമലംഘനം നടത്തുകയും മുന്നറിയിപ്പ്​ നൽകിയിട്ടും തിരുത്താതിരിക്കുകയും ചെയ്യുന്ന കമ്പനികളിലെ മുഴുവൻ തൊഴിലാളികളെയും നാടുകടത്തുമെന്ന്​ മാൻപവർ അതോറിറ്റിയുടെ മുന്നറിയിപ്പ്​.തൊഴിൽ നിയമം ലംഘിക്കുന്ന കമ്പനികളുടെ ഫയൽ മരവിപ്പിക്കുകയാണ്​ ചെയ്​തുവരുന്നത്​. എന്നിട്ടും നിരവധി കമ്പനികൾ മാൻപവർ അതോറിറ്റിയുമായി ബന്ധപ്പെട്ട്​ പ്രശ്​നങ്ങൾ തീർക്കാതെ ബിസിനസ്​ പതിവ്​ ​പോലെ തുടരുകയും ചെയ്യുന്നു. ഇത്​ അനുവദിക്കില്ലെന്നും അടുത്ത വർഷം ശക്​തമായ നടപടികളുണ്ടാവുമെന്നും അധികൃതർ മുന്നറിയിപ്പ്​ നൽകി.

പ്രവർത്തനം അസാധ്യമാക്കും വിധം മുഴുവൻ തൊഴിലാളികളെയും മുന്നറിയിപ്പില്ലാതെ നാടുകടത്തുന്നതാണ്​ പരിഗണിക്കുന്നതെന്ന്​ അധികൃതർ സൂചിപ്പിച്ചു. മനുഷ്യക്കടത്തിനെ പ്രോത്സാഹിപ്പിക്കുന്ന തരത്തിൽ വിസക്കച്ചവടം നടത്തൽ, ഇഖാമ കാലാവധി കഴിഞ്ഞ തൊഴിലാളികളെ ജോലിക്ക്​ വെക്കൽ, തൊഴിലാളികൾക്ക് ശമ്പളം നൽകുന്നതിനും മതിയായ താമസസൗകര്യം ഉറപ്പാക്കുന്നതിലും വീഴ്ച തുടങ്ങിയ നിയമലംഘനങ്ങൾക്കെതിരെ ശക്​തമായ നടപടിയെടുക്കും.

വിസക്കച്ചവടത്തിനായി മാത്രം രൂപവത്​കരിച്ച കടലാസുകമ്പനികളെ പിടികൂടാൻ ജനുവരി മുതൽ പ്രത്യേക പരിശോധന കാമ്പയിൻ നടത്തും. ഫയലുകൾ മരവിപ്പിക്കപ്പെട്ടിട്ടുള്ള കമ്പനിയുമായി ബന്ധപ്പെട്ടവർ എത്രയും വേഗം മാൻപവർ അതോറിറ്റിയുമായി ബന്ധപ്പെടണമെന്ന്​ അധികൃതർ ആവശ്യപ്പെട്ടു.തൊഴിലാളികളുടെ അവകാശങ്ങൾ സംരക്ഷിക്കാൻ കുവൈത്ത്​ പ്രതിജ്​ഞാബദ്ധമാണ്​. അന്താരാഷ്​ട്ര തലത്തിൽ അംഗീകരിക്കുന്ന തൊഴിൽ നിയമങ്ങളും മാർഗനിർദേശങ്ങളും രാജ്യം പാലിക്കുന്നുവെന്ന്​ അധികൃതർ പറഞ്ഞു.