കുവൈത്തിൽ അടച്ചിട്ട കടകളിൽ മോഷണം പെരുകുന്നു

കുവൈത്ത്​ സിറ്റി: കോവിഡ്​ പശ്ചാത്തലത്തിൽ രാജ്യത്ത്​ അടച്ചിട്ട കടകളിൽ മോഷണം പെരുകുന്നു. ഉൾഭാഗങ്ങളിൽ കർഫ്യൂ സമയത്തുപോലും പൂട്ടുപൊളിച്ച്​ മോഷണം നടന്നതായി സി.സി.ടി.വി ദൃശ്യങ്ങൾ വ്യക്​തമാക്കുന്നു. പകൽ വിജനമായ സ്ഥലങ്ങളിലെ ബഖാലകളിൽ ജീവനക്കാരെ മർദിച്ച്​ പണം കവരുന്ന ദൃശ്യങ്ങളും പുറത്തുവന്നു.

മലയാളിയുടെ കടയിലും ഇത്തരം കവർച്ചകളുണ്ടായി. ഒരേ ആൾ തന്നെ വിവിധ ഭാഗങ്ങളിൽ കവർച്ച നടത്തുന്നത്​ ദൃശ്യത്തിൽ വ്യക്​തമാണ്​. പൊലീസ്​ കേസെടുത്ത്​ അന്വേഷണം നടത്തിവരുന്നു. കോവിഡ്​ പ്രതിരോധ പ്രവർത്തനങ്ങളുടെ ഭാഗമായി രാജ്യത്ത്​ അവശ്യസാധനങ്ങൾ ഒഴികെയുള്ളവ വിൽക്കുന്ന കടകൾ തുറക്കാൻ പാടില്ല.

കർഫ്യൂ സമയത്ത്​ ആളുകൾ പുറത്തിറങ്ങാൻ പോലും പാടില്ല. ​പ്രധാന റോഡുകളിൽ കർഫ്യൂ സമയത്ത്​ പൊലീസ്​ നിരീക്ഷണമുണ്ട്​. കഴിഞ്ഞ ദിവസങ്ങളിൽ കവർച്ച നടന്ന കടകളൊക്കെയും ഉൾഭാഗങ്ങളിലാണ്​. കടയിലെ സാധനങ്ങളും എടുത്തുകൊണ്ടുപോവുന്നുണ്ട്​.