സുരക്ഷാ കാമറകളുടെ നിരീക്ഷണം ശക്തമാക്കുന്നു; പ്രത്യേക ഉദ്യോഗസ്ഥരെ നിയമിച്ചു
text_fields
കുവൈത്ത് സിറ്റി: രാജ്യത്ത് സുരക്ഷാ കാമറകളുടെ നിരീക്ഷണം ശക്തമാക്കുന്നു. ഇതിനായി 76 ഉദ്യോഗസ്ഥരെ പ്രത്യേക ചുമതലയിലേക്ക് ആഭ്യന്തര മന്ത്രാലയം നിയമിച്ചു.
സുരക്ഷാ കാമറ നിയമവും പരിശോധന നിയമഭേദഗതിയും അനുസരിച്ചാണ് ഒന്നാം ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് ഫഹദ് അൽ യൂസഫ് സഊദ് അസ്സബാഹ് ഈ ഉത്തരവ് പുറപ്പെടുവിച്ചത്.
മാനവവിഭവശേഷിയും ഐ.ടി വകുപ്പും ഉൾപ്പെട്ട ഈ ഉദ്യോഗസ്ഥർക്ക് സ്ഥാപനങ്ങൾ പരിശോധിക്കാനും ലംഘനങ്ങൾ കണ്ടെത്താനും അധികാരമുണ്ട്.
ലംഘനവുമായി ബന്ധപ്പെട്ട വസ്തുക്കൾ പിടിച്ചെടുക്കാനും റിപ്പോർട്ടുകൾ തയാറാക്കി അധികാരികൾക്ക് കൈമാറാനും ഉദ്യോഗസ്ഥര്‍ക്ക് അധികാരം നൽകി.
പുതിയ ഉത്തരവ് പ്രാബല്യത്തിൽ വന്നതോടെ സുരക്ഷാ നിരീക്ഷണ സംവിധാനം കൂടുതൽ ശക്തമാകുമെന്ന് മന്ത്രാലയം അറിയിച്ചു.