ഒരു വർഷം വ​രേക്കുള്ള ഭക്ഷ്യ കരുതലുണ്ടെന്ന്​ അധികൃതർ

കുവൈത്ത്​ സിറ്റി: കുവൈത്തിൽ ഒരു വർഷം വ​രേക്കുള്ള ഭക്ഷ്യ കരുതലുണ്ടെന്ന്​ വാണിജ്യ വ്യവസായ മന്ത്രാലയം വ്യക്​തമാക്കി. കോവിഡി​െൻറ രണ്ടാം വ്യാപനമുണ്ടാവുമെന്ന്​ ഭയക്കുന്ന പശ്ചാത്തലത്തിലാണ്​ അധികൃതർ ഭക്ഷ്യ സുരക്ഷ ഉറപ്പാക്കാൻ മുൻകരുതൽ നടത്തിയത്​. ആറുമാസം മുതൽ ഒരു വർഷം വരെ ഉപയോഗിക്കാനുള്ള ഭക്ഷ്യ കരുതൽ ശേഖരമുണ്ടെന്ന്​ അധികൃതർ വിലയിരുത്തി. ഏറ്റവും മോശമായ സാഹചര്യം ഉടലെടുത്ത്​ ഭക്ഷ്യ ഇറക്കുമതി അസാധ്യമായ ഘട്ടത്തിൽ പോലും ഒരു വർഷം വരെ രാജ്യത്ത്​ ക്ഷാമമുണ്ടാവില്ല.

ചിലപ്പോൾ ഒരുവർഷത്തിനപ്പുറവും ബാക്കിയുണ്ടാവുമെന്ന്​ സ്​റ്റോക്ക്​ വിലയിരുത്തിയ ശേഷം അധികൃതർ പറഞ്ഞു. മാർച്ച്​ മുതൽ സെപ്​റ്റംബർ വരെയായി 26,317 ടൺ ഫ്രഷും പാകം ചെയ്​തതുമായ ഇറച്ചി കുവൈത്ത്​ ഇറക്കുമതി ചെയ്​തു. 86,762 ടൺ കോഴി, 2.128 ദശലക്ഷം ടൺ ഉള്ളി, 33,178 ടൺ തക്കാളി, 18,420 ടൺ ചെറുനാരങ്ങ എന്നിവ ഇക്കാലയളവിൽ ഇറക്കുമതി ചെയ്​തു. പൊതുവെ ആറുമാസം ​വരേക്കുള്ള സ്​ട്രാറ്റജിക്​ സ്​റ്റോക്​ കരുതാറുള്ള വാണിജ്യ മന്ത്രാലയം കോവിഡ്​ കാലത്ത്​ സംഭരണ ശേഷിയും ഇറക്കുമതിയും കൂട്ടി. ഭക്ഷ്യ സുരക്ഷയെ കരുതി ജനങ്ങൾ ഭയക്കേണ്ടതില്ലെന്നും സർക്കാർ തയാറെടുപ്പ്​ നടത്തിയിട്ടുണ്ടെന്നുമാണ്​ അധികൃതർ പറയുന്നത്​. ​