പ്രവാസം നിർത്തിപ്പോകുന്ന മുതിർന്ന ഇന്ത്യക്കാർക്ക്​ അംബാസഡറെ കാണാൻ അവസരം

കുവൈത്ത്​ സിറ്റി: കുവൈത്ത്​ പ്രവാസം അവസാനിപ്പിച്ച്​ സ്ഥിര താമസത്തിനായി നാട്ടിൽ പോകുന്ന മുതിർന്ന ഇന്ത്യക്കാർക്ക്​ ഇന്ത്യൻ അംബാസഡറെ നേരിട്ട്​ കാണാൻ അവസരമൊരുക്കുന്നു. 60 വയസ്സിന്​ മുകളിലുള്ള പ്രവാസം അവസാനിപ്പിക്കുന്നവർക്ക്​ ഇണകളോടൊപ്പം അംബാസറെ കാണാം. ഇന്ത്യൻ സമൂഹത്തിന്​ പ്രയോജനപ്പെടുന്ന വിധത്തിൽ അവരുടെ ദീർഘകാല പ്രവാസ ജീവിതത്തിലെ അനുഭവങ്ങളും നിർദേശങ്ങളും പങ്കുവെക്കാൻ അവസരമൊരുക്കുകയാണ്​ ലക്ഷ്യം.

ഏത് തരം​ ജോലിക്കാർക്കും അവസരമുണ്ടാകും. കാണാൻ താൽപര്യപ്പെടുന്നവർ അവസാന യാത്രക്ക്​ മുമ്പായി ബന്ധപ്പെടാനുള്ള വിവരങ്ങളും യാത്രതിരിക്കുന്ന തീയതിയും സഹിതം socsec.kuwait.gov.in എന്ന വിലാസത്തിൽ മുൻകൂട്ടി മെയിൽ അയക്കണം. അതനുസരിച്ച്​ കൂടിക്കാഴ്​ചക്ക്​ അപ്പോയൻറ്​മെൻറ്​ നൽകും. ഇന്ത്യൻ സമൂഹവുമായി സംവദിക്കുന്നതിലും അവരുടെ ക്ഷേമകാര്യങ്ങളിൽ ഇടപെടുന്നതിലും ശ്രദ്ധേയമായ ചുവടുവെപ്പുകൾ നടത്തി ജനപ്രീതി നേടിയ അംബാസഡർ സിബി ജോർജി​െൻറ പുതിയ പദ്ധതിയും ജനഹൃദയങ്ങളിൽ ഇടം നേടുന്നതാണ്​. ഏറ്റവും സാധാരണക്കാരന്​ പോലും എംബസി സേവനങ്ങൾ എളുപ്പത്തിൽ പ്രാപ്​തമാക്കിയ ഇടപെടലുകളുടെ തുടർച്ചയാണിതും.