സാഹോദര്യ ബന്ധം കൂടുതൽ കരുത്തുറ്റതാക്കും; മേഖലയിലെ സാഹചര്യം ചർച്ച ചെയ്ത് സൗദി-കുവൈത്ത്​ വിദേശകാര്യ മന്ത്രിമാർ

കുവൈത്ത് സിറ്റി: മേഖലാ സാഹചര്യം ചർച്ച ചെയ്ത് വിദേശകാര്യ മന്ത്രി ശൈഖ്​ ജറാഹ് ജാബിർ അൽ അഹമ്മദ് അസ്സബാഹും സൗദി വിദേശകാര്യ മന്ത്രി അമീർ ഫൈസൽ ബിൻ ഫർഹാൻ ബിൻ അബ്​ദുള്ളയും. റിയാദിലെ വിദേശകാര്യ മന്ത്രാലയ ആസ്ഥാനത്തായിരുന്നു നിർണായകമായ കൂടിക്കാഴ്ച. മേഖലയിലെ നിലവിലെ രാഷ്​ട്രീയ സാഹചര്യങ്ങളും പൊതുവായ താൽപ്പര്യമുള്ള വിവിധ വിഷയങ്ങളും കൂടിക്കാഴ്ചയിൽ വിശകലനം ചെയ്തു.

ഇരുരാജ്യങ്ങളും തമ്മിലുള്ള സാഹോദര്യ ബന്ധം കൂടുതൽ കരുത്തുറ്റതാക്കുന്നതിനായുള്ള മാർഗങ്ങളെക്കുറിച്ചും നേതാക്കൾ ചർച്ച ചെയ്തു. ഔദ്യോഗിക സന്ദർശനത്തിനായി റിയാദിലെത്തിയ കുവൈത്ത്​ വിദേശകാര്യ മന്ത്രിക്ക് ഉജ്ജ്വല സ്വീകരണമാണ് ലഭിച്ചത്. കിങ്​ ഖാലിദ് അന്താരാഷ്​ട്ര വിമാനത്താവളത്തിൽ എത്തിയ ശൈഖ്​ ജറാഹ് ജാബിർ അൽ അഹമ്മദ് അസ്സബാഹിനെ സൗദി വിദേശകാര്യ ഉപമന്ത്രി വലീദ് ബിൻ അബ്​ദുൽ കരീം അൽ ഖുറൈജി നേരിട്ടെത്തി സ്വീകരിച്ചു. കുവൈത്ത്​ മന്ത്രിയുടെ സന്ദർശനത്തിൽ അൽ ഖുറൈജി ഹാർദവമായ സ്വാഗതം ആശംസിച്ചു.