ഗാർഹിക തൊഴിലാളി റിക്രൂട്ടിങ് കമ്പനി സെപ്​റ്റംബറിൽ പ്രവർത്തനം തുടങ്ങുമെന്ന്​ അധികൃതർ

കുവൈത്ത്​ സിറ്റി: കുവൈത്തിൽ പുതുതായി രൂപവത്​കരിച്ച ഗാർഹികത്തൊഴിലാളി റിക്രൂട്ടിങ് കമ്പനി സെപ്​റ്റംബറിൽ പ്രവർത്തിച്ചുതുടങ്ങും. സർക്കാർ  പങ്കാളിത്തത്തോടെ പ്രവർത്തിക്കുന്ന കമ്പനിവഴി കുറഞ്ഞ ചെലവിലും എളുപ്പത്തിലും വീട്ടുജോലിക്കാരെ ലഭ്യമാക്കുമെന്ന് അധികൃതർ അറിയിച്ചു. സ്വദേശികൾക്ക്​ എളുപ്പത്തിലും കുറഞ്ഞ നിരക്കിലും തൊഴിലാളികളെ തെരഞ്ഞെടുക്കാൻ കമ്പനി പ്രതിജ്ഞാബദ്ധമാണെന്ന്​ ചെയർമാൻ ഇയാദ് അൽ സുമൈത്ത് പറഞ്ഞു. കുവൈത്ത് സിറ്റിയിലെ ജാബിർ അൽ ഹമദ് സ്ട്രീറ്റിലുള്ള അൽ അവാദി ടവറിലായിരിക്കും കമ്പനിയുടെ ആസ്ഥാനം. രാജ്യത്തെ എല്ലാ ജംഇയ്യകളിലും റിക്രൂട്ടിങ് കമ്പനിയുടെ ശാഖകൾ പ്രവർത്തിക്കും. കമ്പനി പ്രവർത്തനക്ഷമമാകുന്നതോടെ റിക്രൂട്ട്​മ​െൻറ്​ ചെലവ് പകുതിയായി കുറയും. 

500 മുതൽ 600 ദീനാർ വരെ ഈടാക്കി വിദേശ തൊഴിലാളികളെ ലഭ്യമാക്കാനാണ്​ കമ്പനിയുടെ ശ്രമം. കമ്പനി മുഖേന  റിക്രൂട്ട്​ ചെയ്യുന്ന തൊഴിലാളികൾ പകർച്ചവ്യാധികളിൽനിന്ന്​ മുക്തരാണെന്ന്​ ഉറപ്പുവരുത്തുമെന്നും ഇതിനാവശ്യമായ പരിശോധനകൾ സ്വന്തം രാജ്യങ്ങളിൽനിന്ന് നടത്തിയശേഷമായിരിക്കും ജോലിക്കാരെ റിക്രൂട്ട്​ ചെയ്യുകയെന്നും കമ്പനി ചെയർമാൻ വ്യക്തമാക്കി. ജനറൽ ഇൻവെസ്​റ്റ്​മ​െൻറ് അതോറിറ്റി, കോഓപറേറ്റിവ് സൊസൈറ്റി യൂനിയൻ തുടങ്ങിയ വിഭാഗങ്ങളുടെ സംയുക്ത സംരംഭമായാണ് നിർദിഷ്​ട ഗാർഹിക തൊഴിലാളി റിക്രൂട്ടിങ് കമ്പനി പ്രവർത്തിക്കുക.

കോഓപറേറ്റിവ് സൊസൈറ്റികൾക്ക് 60 ശതമാനം, പബ്ലിക് അതോറിറ്റി ഫോർ ഇൻവെസ്​റ്റ്മ​െൻറ്, കുവൈത്ത് എയർവേസ്​​, അമീരി ദിവാൻ, സാമൂഹിക സുരക്ഷക്കുള്ള പബ്ലിക് അതോറിറ്റി എന്നിവക്ക് പത്തു ശതമാനം വീതം എന്നിങ്ങനെയാണ് നിക്ഷേപ പങ്കാളിത്തം.