തിരിച്ചുപോക്കിന്​​ കളമൊരുങ്ങിയതിൽ പ്രവാസികൾക്ക്​ ആശ്വാസം

കുവൈത്ത്​ സിറ്റി: ദീർഘനാളത്തെ അനിശ്ചിതത്വത്തിനു​ശേഷം ഗൾഫ്​ രാജ്യങ്ങളിൽ കുടുങ്ങിയ ഇന്ത്യക്കാർക്ക്​ നാട്ടിലേക്കു​ പോകാൻ കളമൊരുങ്ങിയത്​ ആശ്വാസം. വിമാനങ്ങളും നാവികസേന കപ്പലുകളും പ്രയോജനപ്പെടുത്തിയാണ്​ മടക്കയാത്ര ഒരുക്കുക. അതേസമയം, യാത്രച്ചെലവ്​ പ്രവാസികൾ വഹിക്കേണ്ടിവരും​. കുവൈത്തിൽ പൊതുമാപ്പിന്​ രജിസ്​റ്റർചെയ്​ത 12000ത്തോളം ഇന്ത്യക്കാർ നാട്ടിൽപോകാൻ അനുമതി കാത്ത്​ ക്യാമ്പിൽ കഴിയുന്നുണ്ട്​. ഇവർക്ക്​ വിമാനസൗകര്യം കുവൈത്ത്​ സർക്കാർ സൗജന്യമായി ഒരുക്കും. മറ്റുള്ളവരാണ്​ പണം നൽകി പോകേണ്ടിവരുക. എത്ര തുകയെന്നതിൽ വ്യക്​തത വന്നിട്ടില്ല. ജോലിയും വരുമാനവുമില്ലാതായി ആളുകൾ പ്രയാസപ്പെടുന്ന ഘട്ടത്തിൽ നാട്ടിലേക്ക്​ മടങ്ങാൻ ആഗ്രഹിക്കുന്നവരെ സൗജന്യമായി കൊണ്ടുപോകണമെന്നായിരുന്നു ആവശ്യമെങ്കിലും കേന്ദ്ര സർക്കാർ ഇത്​ അംഗീകരിച്ചിട്ടില്ല. കോവിഡ്​ ലക്ഷണങ്ങൾ ഇല്ലാത്തവർക്ക്​ മാത്രമാണ്​ യാത്രാനുമതി ലഭിക്കുക. 

യാത്രയിലും നിരവധി ചട്ടങ്ങൾ പാലിക്കേണ്ടിവരും. നാട്ടിലെത്തിയാൽ ക്വാറൻറീൻ ഉൾപ്പെടെ സൗകര്യങ്ങൾ ഒരുക്കേണ്ടത്​ സംസ്ഥാന സർക്കാറുകളാണ്​. 
യാത്രച്ചെലവ്​ പ്രവാസികൾ വഹിക്കേണ്ടതിനാൽ കേന്ദ്ര സർക്കാറിന്​ സാമ്പത്തികബാധ്യതയില്ല. ഇന്ത്യൻ എംബസികളും കോൺസുലേറ്റുകളും അതത്​ രാജ്യങ്ങളിൽ കുടുങ്ങിയ ഇന്ത്യക്കാരുടെ പട്ടിക തയാറാക്കിവരുകയാണ്​. https://indembkwt.com/eva/  എന്ന വെബ്​സൈറ്റ്​ ലിങ്ക്​ വഴിയാണ്​ കുവൈത്തിലെ ഇന്ത്യക്കാർ രജിസ്​റ്റർ ചെയ്യേണ്ടത്​. കുടുംബത്തിലെ ഒാരോ വ്യക്​തിയും പ്രത്യേകം ഫോം ഫിൽ ചെയ്യണം. അതുപോലെ പോകാൻ ആഗ്രഹിക്കുന്ന കമ്പനികളിലെ ഒാരോ തൊഴിലാളിയും പ്രത്യേകം ഫോം ഫിൽ ചെയ്യണം.