പൊലീസുകാര്‍ ഒൗദ്യോഗിക വാഹനവുമായി വീട്ടില്‍ പോകരുതെന്ന് നിര്‍ദേശം

കുവൈത്ത് സിറ്റി:  ആഭ്യന്തരമന്ത്രാലയത്തിലെ സുരക്ഷാ ഉദ്യോഗസ്ഥര്‍ ഡ്യൂട്ടി സമയത്ത് ഒൗദ്യോഗിക വാഹനവുമായി വീട്ടില്‍പോകാന്‍ പാടില്ളെന്ന് നിര്‍ദേശം.
 മന്ത്രാലത്തിന്‍െറ വാഹനങ്ങള്‍ ഹോട്ടലുകള്‍, ഷോപ്പുകള്‍ എന്നിവക്ക് മുന്നില്‍ അലക്ഷ്യമായി നിര്‍ത്തിയിടുന്നതില്‍നിന്നും ഉദ്യോഗസ്ഥരെ വിലക്കിയിട്ടുണ്ട്. ആഭ്യന്തരമന്ത്രാലയത്തിലെ പൊതു പരിശോധനാ വിഭാഗം മേധാവി മേജര്‍ ജനറല്‍ മുഹമ്മദ് അലി അല്‍ ഇന്‍സിയാണ് ഇതുസംബന്ധിച്ച കര്‍ശന നിര്‍ദേശം നല്‍കിയത്. ഡ്യൂട്ടിയിലാണെന്ന കാര്യം മറന്ന് സ്വദേശികളോടും വിദേശികളോടും അതിരുവിട്ട് ഇടപെടുന്നവരുണ്ട്. സുരക്ഷാ ഉദ്യോഗസ്ഥരെ കുറിച്ച ആദരവും ബഹുമാനവും കുറക്കാന്‍ ഇടയാക്കുന്ന ഇത്തരം പ്രവൃത്തികള്‍ പൊലീസിന്‍െറ ഭാഗത്തുനിന്നുണ്ടാവാന്‍ പാടില്ളെന്നും പ്രാദേശിക പത്രവുമായുള്ള അഭിമുഖത്തില്‍ അദ്ദേഹം വ്യക്തമാക്കി.