പാർലമെൻറ് തിരഞ്ഞെടുപ്പ്: കുവൈത്തിൽ സുരക്ഷ ശക്തമാക്കി

കുവൈത്ത്​ സിറ്റി: പാർലമെൻറ് തെരഞ്ഞെടുപ്പിന് രണ്ടു ദിവസം മാത്രം ബാക്കിയിരിക്കെ ആഭ്യന്തരമന്ത്രാലയം ഉന്നതതല യോഗം ചേർന്ന് സുരക്ഷാ ക്രമീകരണത്തിന് പദ്ധതി തയാറാക്കി. ആഭ്യന്തരമന്ത്രി അനസ്​ അൽ സാലിഹി​െൻറ അധ്യക്ഷതയിൽ സബ്ഹാനിലെ മന്ത്രാലയ ആസ്​ഥാനത്ത് നടന്ന മുതിർന്ന ഉദ്യോഗസ്​ഥരുടെ യോഗമാണ് തെരഞ്ഞെടുപ്പ് ദിനത്തിൽ കൈകൊള്ളേണ്ട സുരക്ഷാ ക്രമീകരണത്തിന് പദ്ധതി ആവിഷ്കരിച്ചത്. തെരഞ്ഞെടുപ്പ് നടക്കുന്ന അഞ്ച് മണ്ഡലങ്ങളെയും മന്ത്രാലയത്തിെൻറ ഓപറേഷൻ ഡിപ്പാർട്ടുമെൻറുമായി ബന്ധിപ്പിച്ചു. എവിടെയെങ്കിലും അനിഷ്​ട സംഭവങ്ങൾ റിപ്പോർട്ട് ചെയ്യപ്പെട്ടാൽ ഓപറേഷൻ റൂമിൽ അപ്പപ്പോൾ വിവരം ലഭ്യമാവുന്ന രൂപത്തിലാണ് സംവിധാനം ഒരുക്കിയത്. സ്വദേശികൾക്ക് സുരക്ഷിതമായും സമ്മർദ്ദമില്ലാതെയും വോട്ടുചെയ്യാനുള്ള സുരക്ഷ ഉറപ്പുവരുത്തുന്നതിെൻറ ഭാഗമായാണിത്. കോവിഡ്​ ബാധിതർക്ക്​ പ്രത്യേക പോളിങ്​ സ്​റ്റേഷനുകൾ ഒരുക്കിയിട്ടുണ്ട്​. ഒാരോ ഗവർണറേറ്റിലും ഒന്നുവീതം ആറ്​ സ്​റ്റേഷനുകളാണ്​ ഇത്തരത്തിൽ തയാറാക്കിയത്​.

പ്രായാധിക്യത്താൽ പ്രയാസപ്പെടുന്നവർ, രോഗികൾ, വികലാംഗർ ഉൾപ്പെടെ പ്രത്യേക പരിഗണന അർഹിക്കുന്നവരെ പോളിങ് സ്​റ്റേഷനുകളിലെത്തിക്കാനും തിരിച്ച് വീടുകളിൽ കൊണ്ടുവിടുന്നതിനും പ്രത്യേക വിഭാഗത്തെ ചുമതലപ്പെടുത്തിയിട്ടുണ്ട്. ഗതാഗത തടസ്സം ഇല്ലാതാക്കാൻ റോഡുകളിൽ നിരീക്ഷണത്തിന് കൂടുതൽ ഉദ്യോഗസ്​ഥർക്ക് ചുമതല നൽകും. പൊലീസ്​, ദേശീയ ഗാൾഡ്, വനിതാ പൊലീസ്​ ഉൾപ്പെടെ കൂടുതൽ ഉദ്യോഗസ്​ഥരെ രാജ്യത്തിെൻറ എല്ലാ ഭാഗങ്ങളിലും വിന്യസിക്കും. അതേസമയം, സുരക്ഷക്ക് ഭീഷണിയാവുന്ന തരത്തിലുള്ള അനിഷ്​ട സംഭവങ്ങൾ ഉണ്ടായാൽ വെടിവെക്കാനുള്ള നിർദേശമാണ് ഉദ്യോഗസ്​ഥർക്ക് നൽകിയത്.