കുവൈത്തിൽ ഒരു കോവിഡ്​ മരണം കൂടി; 55 പുതിയ കേസുകൾ

കുവൈത്ത്​ സിറ്റി: കുവൈത്തിൽ ഒരാൾ കൂടി കോവിഡ്​ ബാധിച്ച്​ മരിച്ചു. ഇതോടെ രാജ്യത്തെ കോവിഡ്​ മരണം മൂന്നായി. സ് വദേശി വനിതയാണ്​ മരിച്ചത്​. 55 പേർക്ക്​ പുതുതായി കോവിഡ്​ സ്ഥിരീകരിച്ചു. ഇതോടെ കുവൈത്തിൽ കോവിഡ്​ സ്ഥിരീകരിച്ച വർ 1355 ആയി. ചൊവ്വാഴ്​ചത്തെ 26 പേരടക്കം 176 പേർ രോഗമുക്​തി നേടി.

ബാക്കി 1176 പേരാണ്​ ചികിത്സയിലുള്ളത്​. 26 പേർ തീവ്രപരിചരണ വിഭാഗത്തിലാണ്​. പുതിയ കോവിഡ്​ ബാധിതരിൽ മൂന്നുപേർ വിദേശത്തുനിന്ന്​ വന്നവരും 43 പേർ നേരത്തെ സ്ഥിരീകരിച്ചവരുമായി സമ്പർക്കം പുലർത്തിവരുമാണ്​. ഒമ്പതുപേർക്ക്​ ഏതുവഴിയാണ്​ വൈറസ്​ ബാധിച്ചതെന്ന്​ കണ്ടെത്തിയിട്ടില്ല.

ബ്രിട്ടനിൽനിന്ന്​ വന്ന രണ്ട്​ കുവൈത്തികൾ​, ഫ്രാൻസിൽനിന്ന്​ വന്ന ഒരു കുവൈത്തി എന്നിവർക്ക്​ കോവിഡ്​ സ്ഥിരീകരിച്ചു. 26 ഇന്ത്യക്കാർ, രണ്ട്​ കുവൈത്തികൾ, നാല്​ ബംഗ്ലാദേശികൾ, മൂന്ന്​ പാകിസ്ഥാനികൾ, മൂന്ന്​ ഇൗജിപ്​തുകാർ, നേപ്പാൾ, ഫിലിപ്പീൻസ്​, ഇറാൻ, ചൈന, അഫ്​ഗാനിസ്ഥാൻ എന്നിവിടങ്ങളിൽനിന്നുള്ള ഒാരോരുത്തർ എന്നിവർക്കും വൈറസ്​ സ്ഥിരീകരിച്ചു. മൂന്ന്​ ഇന്ത്യക്കാർ, രണ്ട്​ ഇൗജിപ്​തുകാർ, ഒരു കുവൈത്തി, ഒരു ലബനീസ്​ പൗരൻ, ഒരു പാകിസ്ഥാനി, ഒരു ബംഗ്ലാദേശി എന്നിവർക്ക്​ വൈറസ്​ ബാധയേറ്റ വഴിയാണ്​ കണ്ടെത്താനുള്ളത്​.