ഒമി​​ക്രോൺ: വാണിജ്യ പ്രവർത്തനം നിയന്ത്രിക്കില്ലെന്ന്​ സർക്കാർ

കുവൈത്ത്​ സിറ്റി: 12 പുതിയ ഒമി​ക്രോൺ കേസുകൾ റിപ്പോർട്ട്​ ചെയ്​ത പശ്ചാത്തലത്തിൽ കനത്ത ജാഗ്രതയിലാണെങ്കിലും കുവൈത്തിൽ തൽക്കാലം വാണിജ്യ പ്രവർത്തനങ്ങൾക്ക്​ നിയ​ന്ത്രണം ഏർപ്പെടുത്താൻ ഉദ്ദേശ്യമില്ലെന്ന്​ സർക്കാർ വൃത്തങ്ങൾ.

ജനങ്ങളിൽ ഭൂരിഭാഗവും വാക്​സിൻ സ്വീകരിച്ചതിനാൽ മറ്റു ആരോഗ്യ സുരക്ഷ നടപടികൾ കർശനമായി പാലിച്ചാൽ മതിയാകും എന്നാണ്​ ഇപ്പോഴത്തെ വിലയിരുത്തൽ. അതേസമയം ഒമിക്രോൺ വ്യാപിക്കുകയാണെങ്കിൽ നേരിട്ടുള്ള അധ്യയനത്തിന്​ പകരം ഓൺലൈൻ വിദ്യാഭ്യാസം പുനഃസ്ഥാപിക്കുന്നത്​ ഉൾപ്പെടെ നടപടികൾ പരിഗണിക്കുമെന്ന സൂചനയും ഇവർ നൽകി.

അടച്ചിട്ട സ്ഥലങ്ങളിലും ആളുകൂടുന്നയിടങ്ങളിലും മാസ്​ക്​ ധരിക്കുന്നത്​ ഉൾപ്പെടെ ആരോഗ്യസുരക്ഷ മാർഗനിർദേശങ്ങൾ പാലിക്കുക, ഫീൽഡ്​ പരിശോധന ശക്​തമാക്കുക, വാക്​സിനെടുക്കാൻ ബോധവത്​കരണം ശക്​തമാക്കുക, യാത്രകൾക്ക്​ വാക്​സിനേഷൻ നിർബന്ധമാക്കുക, ഫീൽഡ്​ വാക്​സിനേഷൻ, പരിശോധന കാര്യക്ഷമമായി തുടരുക, കുവൈത്തിലേക്ക്​ പ്രവേശിക്കുന്നതിന്​ നിശ്ചയിച്ചിട്ടുള്ള വാക്​സിനേഷനും പി.സി.ആർ പരിശോധനയും ഉൾപ്പെടെ നിബന്ധനകൾ കർശനമായി പാലിക്കുന്നുണ്ടെന്ന്​ ഉറപ്പാക്കുക എന്നിവയാണ് തൽക്കാലം സ്വീകരിക്കുന്ന പ്രതിരോധ നടപടികൾ.

അതിനിടെ, പുതിയ ​ഒമി​ക്രോൺ കേസുകൾ രാജ്യത്തേക്ക്​ എത്താതിരിക്കാൻ അധികൃതർ വിമാനത്താവളത്തിൽ പരമാവധി ജാഗ്രത പുലർത്തുന്നുണ്ട്​. വൈറസ്​ വകഭേദം റിപ്പോർട്ട്​ ചെയ്​ത രാജ്യങ്ങളിൽനിന്ന്​ വരുന്നവരെ പ്രത്യേകം നിരീക്ഷിക്കുന്നു. 13 പേർക്കാണ്​ ഇതുവരെ കുവൈത്തിൽ ഒമിക്രോൺ വൈറസ്​ ബാധിച്ചത്​.

ആരോഗ്യമന്ത്രാലയത്തി​‍െൻറ മേൽനോട്ടത്തിൽ ക്വാറൻറീനിൽ കഴിയുന്ന ഇവർ പുറത്തുള്ളവരുമായി സമ്പർക്കം പുലർത്തിയിട്ടില്ല.

16 വയസ്സിന്​ മുകളിലുള്ളവർക്ക്​ ബൂസ്​റ്റർ ഡോസ്​ വാക്​സിനെടുക്കാം

കുവൈത്ത്​ സിറ്റി: 16 വയസ്സിന്​ മുകളിലുള്ളവർക്ക്​ ബൂസ്​റ്റർ ഡോസ്​ വാക്​സിനെടുക്കാമെന്ന്​ കുവൈത്ത്​ ആരോഗ്യ മന്ത്രാലയം വ്യക്​തമാക്കി. മിശ്​രിഫ്​ ഇൻറർനാഷനൽ ഫെയർ ഗ്രൗണ്ടിലെ വാക്​സിനേഷൻ സെൻററിൽ അപ്പോയിൻറ്​മെൻറ്​ ഇല്ലാതെ എത്തിയാലും കുത്തിവെപ്പ്​ എടുക്കാമെന്നും മറ്റു കേന്ദ്രങ്ങളിൽ പോകാൻ ആഗ്രഹിക്കുന്നവർ ആരോഗ്യ മന്ത്രാലയത്തി​‍െൻറ വെബ്​സൈറ്റ്​ വഴി അപ്പോയിൻറ്​മെൻറ്​ എടുക്കണമെന്നും വക്താവ്​ ഡോ. അബ്​ദുല്ല അൽ സനദ്​ വാർത്തക്കുറിപ്പിൽ അറിയിച്ചു.

ജനുവരി രണ്ടുമുതലാണ്​ കുവൈത്തിലേക്ക്​ വരുന്നവർക്ക്​ ബൂസ്​റ്റർ ഡോസ്​ വാക്​സിൻ നിർബന്ധമാക്കുന്നത്​. രണ്ടാം ഡോസ്​ എടുത്ത്​ ഒമ്പതുമാസം കഴിഞ്ഞവർക്കാണ്​ നിബന്ധന ബാധകമാകുക.

ബൂസ്​റ്റർ ഡോസ്​ വാക്​സിൻ സ്വീകരിച്ചവർക്ക്​ ഒമിക്രോൺ പ്രതിരോധിക്കാൻ 98 ശതമാനം വരെ സാധ്യതയു​ണ്ടെന്നാണ്​ പഠനങ്ങൾ വ്യക്​തമാക്കുന്നത്​.