മുൻ ഔഖാഫ്​ മ​ന്ത്രി യൂസുഫുൽ ജാസിം അൽ ഹിജ്ജി അന്തരിച്ചു

കുവൈത്ത്​ സിറ്റി: ഫൈസൽ അവാർഡ്​ ജേതാവും മുൻ കുവൈത്ത്​ മതകാര്യ മന്ത്രിയുമായ യൂസുഫുൽ ജാസിം അൽ ഹിജ്ജി അന്തരിച്ചു. ഇൻറർനാഷനൽ ഇസ്​ലാമിക്​ ചാരിറ്റി ഒാർഗനൈസേഷൻ കുവൈത്ത്​ സ്ഥാപക ചെയർമാനുമായിരുന്നു.

1987ൽ അന്നത്തെ അമീർ ശൈഖ്​ ജാബിർ അൽ അഹ്​മദ്​ അസ്സബാഹി​​െൻറ പ്രത്യേക ഉത്തരവ്​ പ്രകാരം സ്ഥാപിച്ച സംഘടനയുടെ തുടക്കം മുതൽ 25 വർഷക്കാലം യൂസുഫുൽ ജാസിം അൽ ഹിജ്ജി ആയിരുന്നു ചെയർമാൻ. ലോകത്തി​​െൻറ വിവിധ ഭാഗങ്ങളിൽ​ അദ്ദേഹത്തി​​െൻറ നേതൃത്വത്തിൽ ഇൻറർനാഷനൽ ഇസ്​ലാമിക്​ ചാരിറ്റി ഒാർഗനൈസേഷൻ കോടിക്കണക്കിന്​ ദീനാറി​​െൻറ ജീവകാര്യകാരുണ്യ പ്രവർത്തനങ്ങളാണ്​ നടത്തിയത്​.

2006ലാണ്​ ഇസ്​ലാമിക സേവനത്തിന്​ അന്താരാഷ്​ട്ര തലത്തിൽ പ്രസിദ്ധമായ ഫൈസൽ അവാർഡ്​ അദ്ദേഹത്തെ തേടിയെത്തിയത്​. 1923ൽ ജനിച്ച യൂസുഫുൽ ജാസിം അൽ ഹിജ്ജി ഇസ്​ലാമിക പണ്ഡിതനും മികച്ച സംഘാടകനുമായിരുന്നു. കുവൈത്ത്​ ഫിനാൻസ്​ ഹൗസ്​, ശരീഅ കോളജ്​ തുടങ്ങിയ സ്ഥാപനങ്ങൾ ആരംഭിക്കുന്നതിൽ നേതൃപരമായ പങ്കുവഹിച്ചിട്ടുണ്ട്​.

1976 മുതൽ 1981 വരെയാണ്​ കുവൈത്ത്​ ഒൗഖാഫ്​ മന്ത്രിയായത്​. അതിന്​ മുമ്പ്​ 1962 മുതൽ 1970 വരെ കുവൈത്ത്​ ആരോഗ്യ മന്ത്രാലയത്തിൽ അണ്ടർ സെക്രട്ടറിയായും സേവനം ചെയ്തിട്ടുണ്ട്​.