കുവൈത്തിൽനിന്ന്​ ഇന്ത്യയിലേക്ക്​ പോകാൻ പി.സി.ആർ​ വേണ്ട

കുവൈത്ത്​ സിറ്റി: കേന്ദ്രസർക്കാർ യാത്ര ഇളവ്​ പ്രഖ്യാപിച്ച രാജ്യങ്ങളുടെ പട്ടികയിൽ കുവൈത്തിനെയും ഉൾപ്പെടുത്തി. രണ്ട്​ ഡോസ്​ വാക്സിൻ സ്വീകരിച്ചവർക്ക്​ കോവിഡ്​ ​പരിശോധന നടത്താതെ നാട്ടിലെത്താൻ കേന്ദ്രസർക്കാർ തയാറാക്കിയ പട്ടികയിലാണ്​ വൈകിയെങ്കിലും കുവൈത്തിനെയും ഉൾപ്പെടുത്തിയത്​. കുവൈത്തിനേക്കാൾ കൂടുതൽ കോവിഡ്​ കേസുകൾ റിപ്പോർട്ട്​ ചെയ്യുന്ന രാജ്യങ്ങളെ ഉൾപെടുത്തിയിട്ടും കേന്ദ്രസർക്കാരിന്‍റെ പട്ടികയിൽ കുവൈത്തിനെ ഉൾപ്പെടുത്താത്തത്​ പ്രതിഷേധത്തിനിടയാക്കിയിരുന്നു. ഭൂരിഭാഗം പേരും വാക്​സിനേഷൻ പൂർത്തീകരിച്ചവരാണ് കുവൈത്തിലുള്ളത്​. നല്ലൊരു ശതമാനം ജനങ്ങളും ബൂസ്റ്റർ ഡോസും സ്വീകരിച്ച്​ കഴിഞ്ഞു. കുവൈത്തിലേക്ക്​ വരുന്നതിനും പി.സി.ആർ, വാക്​സിനേഷൻ, ക്വാറൻറീൻ നിബന്ധനകൾ കഴിഞ്ഞ ദിവസം ഒഴിവാക്കിയിരുന്നു. പ്രവാസി സമൂഹത്തിന്​ ഏറെ ആശ്വാസം പകരുന്ന തീരുമാനങ്ങളാണ്​ രണ്ട്​ ദിവസത്തി​നിടെ ഇരു രാജ്യത്തി​െൻറയും ഭാഗത്തുനിന്ന്​ ഉണ്ടായത്​. ഇപ്പോൾ എല്ലാ ഗൾഫ്​ രാജ്യങ്ങളും യാത്രാ ഇളവി​ന്‍റെ പട്ടികയിൽ ഉൾപ്പെട്ടു. ആദ്യ ഘട്ട പട്ടികയിൽ കുവൈത്തും യു.എ.ഇയും ഉണ്ടായിരുന്നില്ല. രണ്ടാം ഘട്ടത്തിൽ യു.എ.ഇ ഉൾപ്പെട്ടു. ഇപ്പോൾ കുവൈത്തും ഉൾപ്പെട്ടു.