നീറ്റ്​ പരീക്ഷ കുവൈത്തിലെ പരീക്ഷകേന്ദ്രം എംബസി തന്നെ

കുവൈത്ത്​ കേന്ദ്രമായി അപേക്ഷിച്ച, നാട്ടിൽ കുടുങ്ങിയവർക്ക്​ പരീക്ഷകേന്ദ്രം മാറ്റാം

കുവൈത്ത്​ സിറ്റി: നാഷനൽ എലിജിബിലിറ്റി കം എൻട്രൻസ്​ ടെസ്​റ്റ്​ (നീറ്റ്​) പരീക്ഷ കുവൈത്തിൽ നടത്തുന്നത്​ ഇന്ത്യൻ എംബസിയിൽ തന്നെ. സെപ്​റ്റംബർ 12നാണ്​ പരീക്ഷ നടത്തുക.കുവൈത്തിലെ ഇന്ത്യൻ എംബസിയുടെ പരിശ്രമങ്ങൾ വിജയത്തിലെത്തിയതോടെ കുവൈത്തിലെ ഇന്ത്യൻ ​വിദ്യാർഥികൾക്ക്​ ആശ്വാസമായി ഇവിടെ പരീക്ഷകേന്ദ്രം അനുവദിക്കപ്പെട്ടത്​.

യാത്ര നിയന്ത്രണങ്ങളുടെ പശ്ചാത്തലത്തിൽ കുവൈത്തില്‍നിന്ന് പരീക്ഷക്കായി ഇന്ത്യയിലേക്ക് യാത്ര ചെയ്യുന്നത് വെല്ലുവിളിയായിരുന്നു. അതേസമയം, കുവൈത്ത്​ പരീക്ഷകേന്ദ്രമായി തിരഞ്ഞെടുക്കുകയും വിമാനമില്ലാത്തതിനാൽ കുവൈത്തിലേക്ക്​ വരാൻ കഴിയാതെ നാട്ടിൽ കുടുങ്ങുകയും ചെയ്​തവർക്ക്​ ഇന്ത്യയിലെയോ ദുബൈയിലെയോ മറ്റേതെങ്കിലും കേന്ദ്രത്തിലേക്ക്​ മാറ്റാൻ അവസരമുണ്ട്​. ഇതുസംബന്ധിച്ച്​ കഴിഞ്ഞ ദിവസം വിദ്യാർഥികൾക്ക്​ ലഭിച്ച മെയിൽ ചിലരെയെങ്കിലും ആശയക്കുഴപ്പത്തിലാക്കിയിട്ടുണ്ട്​.

കുവൈത്തിലെ പരീക്ഷകേന്ദ്രം ഒഴിവാക്കിയെന്ന സംശയത്തിൽ എംബസിയിൽ നിരവധി അന്വേഷണങ്ങളാണ്​ ലഭിച്ചത്​.

തുടർന്ന്​ എംബസി വിശദീകരണക്കുറിപ്പ്​ ഇറക്കി. നിലവിൽ കുവൈത്തിലുള്ളവർക്ക്​ എംബസിയിലെ പരീക്ഷ കേന്ദ്രത്തിൽ പരീക്ഷ എഴുതാമെന്നും അവർ കഴിഞ്ഞ ദിവസത്തെ മെയിൽ കണക്കിലെടുക്കേണ്ടതില്ലെന്നും അധികൃതർ വ്യക്​തമാക്കി.

ഇവിടെ എത്താൻ കഴിയാത്തവർക്ക്​ നാട്ടിലോ ദുബൈയിലോ പരീക്ഷ എഴുതാൻ അവസരം നൽകുന്നത്​ സംബന്ധിച്ചു​ മാത്രമാണ്​ ഇൗ മെയിൽ.

ഇനിയും വിഷയത്തിൽ സംശയമുള്ളവർക്ക്​ fs.kuwait@mea.gov.in, edu.kuwait@mea.gov.in എന്നീ മെയിൽ വിലാസങ്ങളിൽ അന്വേഷിക്കാവുന്നതാണ്​.