കുവൈത്തിൽ ആരോഗ്യ ജീവനക്കാർക്ക്​ സുരക്ഷ ഒരുക്കും

കുവൈത്ത്​ സിറ്റി: കുവൈത്തിൽ ആരോഗ്യ ജീവനക്കാർക്ക്​ സുരക്ഷ ഒരുക്കാൻ നീക്കം. കഴിഞ്ഞ ദിവസം ഇൗജിപ്​ഷ്യൻ വനിത ഡോക്​ടർ​ക്ക്​ നേരെ കൈയേറ്റമുണ്ടായത്​ ആരോഗ്യ മന്ത്രാലയം ഗൗരവത്തിലെടുക്കുന്നു. ഡോക്​ടർമാരും നഴ്​സുമാരും ഉൾപ്പെടെ എല്ലാ ആരോഗ്യ ജീവനക്കാർക്കും സുരക്ഷ ഒരുക്കുന്നതാണ്​ പരിഗണിക്കുന്നത്​. ഇൗസ്​റ്റ്​ മുബാറക്​ അൽ കബീർ ഹെൽത്​ സെൻററിൽ പത്തുവർഷമായി ജോലി ചെയ്​തിരുന്ന ഇൗജിപ്​ഷ്യൻ ഡോക്​ടർ ഷിഫ്​റ്റം സംവിധാനത്തി​െൻറ ഭാഗമായി അൽ റഖ ഹെൽത്​ സെൻററിൽ ജോലി ചെയ്യുന്നതിനിടെയാണ്​ കൈയേറ്റം.

നല്ല സ്വഭാവവും ചട്ടങ്ങളും നിയമവും പാലിക്കുന്നതിൽ കണിശതയുള്ളയാളായിരുന്നു ഇൗ ഡോക്​ടർ എന്ന്​ സഹപ്രവർത്തകർ സാക്ഷ്യപ്പെടുത്തുന്നു. ഒരു സന്ദർശകനോട്​ അൽപസമയം പുറത്ത്​ കാത്തിരിക്കാൻ പറഞ്ഞതിന്​ പ്രകോപിതനായി അസഭ്യവർഷം നടത്തുകയും കൈയേറ്റം ചെയ്യുകയുമായിരുന്നു. ക്രൂരമായി അക്രമിക്കു​േമ്പാൾ സഹപ്രവർത്തകർ ഇടപെട്ടത്​ കൊണ്ടാണ്​ ജീവൻ രക്ഷിക്കാൻ കഴിഞ്ഞത്​. ഡോക്​ടർമാർക്കും ആരോഗ്യ ജീവനക്കാർക്കുമെതിരായ അതിക്രമങ്ങൾ ആവർത്തിക്കുന്ന പശ്ചാത്തലത്തിൽ ഇതിന്​ തടയിടാൻ നിയമനിർമാണം നടത്തണമെന്നും സുരക്ഷ ഒരുക്കണമെന്നും ആവശ്യമുയരാൻ തുടങ്ങി നാളേറെയായി.

ആശുപത്രികളിൽ മതിയായ സുരക്ഷാ ഉദ്യോഗസ്ഥരെ നിയമിക്കണമെന്ന്​ ആരോഗ്യ മന്ത്രാലയം ആഭ്യന്തര മന്ത്രാലയത്തോട്​ ആവശ്യപ്പെട്ടിട്ടുണ്ട്​. ഒാരോ ഡോക്​ടർമാരുടെയും കാബിന്​ മുന്നിൽ സുരക്ഷാ ഉദ്യോഗസ്ഥരെ നിയമിക്കുന്നത്​ പ്രായോഗികമല്ലെന്നും നിയമനിർമാണത്തിലൂടെ ശിക്ഷ കടുപ്പിക്കുകയും നടപടികൾ ശക്​തമാക്കുകയുമാണ്​ പരിഹാരമെന്നുമാണ്​ ആഭ്യന്തര മന്ത്രാലയം നേരത്തെ സ്വീകരിച്ച നിലപാട്​. പുതിയ സാഹചര്യത്തിൽ ഇതിൽ മാറ്റം വരുമെന്നാണ്​ കരുതുന്നത്​. രോഗികളും കൂടെ എത്തുന്നവരും ചെറിയ കാരണങ്ങൾക്കും അകാരണമായും പ്രകോപിതരാവുകയും കൈയേറ്റത്തിന്​ മുതിരുകയുമാണെന്നാണ്​ പരാതി.