ഇന്ത്യയടക്കം ഏഴ്​ രാജ്യത്തുനിന്ന്​ കുവൈത്തിലേക്ക്​ പ്രവേശന വിലക്ക്​

ഇന്ത്യ, ബംഗ്ലാദേശ്​, ശ്രീലങ്ക, പാകിസ്ഥാൻ, ഫിലിപ്പീൻസ്​, ഇറാൻ, നേപ്പാൾ എന്നിവയാണ്​ രാജ്യങ്ങൾ
നേരിട്ട്​ വരാതെ മറ്റുരാജ്യങ്ങളിൽ 14 ദിവസം താമസിച്ച ശേഷം കുവൈത്തിലേക്ക്​ വരാം
കുവൈത്ത്​ സിറ്റി: കോവിഡ്​ പ്രതിസന്ധിയു​ടെ പശ്ചാത്തലത്തിൽ ഇന്ത്യയടക്കം ഏഴ്​ രാജ്യങ്ങളിൽനിന്നുള്ള യാത്രക്കാർക്ക്​ കുവൈത്തിൽ താൽക്കാലികമായി പ്രവേശന വിലക്ക്​ ഏർപ്പെടുത്തി. ഇന്ത്യ, ബംഗ്ലാദേശ്​, ശ്രീലങ്ക, പാകിസ്ഥാൻ, ഫിലിപ്പീൻസ്​, ഇറാൻ, നേപ്പാൾ എന്നീ രാജ്യത്തുനിന്നുള്ള യാത്രക്കാർക്കാണ്​ പ്രവേശന വിലക്ക്​. 

ആഗസ്​റ്റ്​ ഒന്നുമുതൽ കുവൈത്ത്​ അന്താരാഷ്​​ട്ര വിമാനത്താവളത്തിൽ കൊമേഴ്​സ്യൽ വിമാന സർവീസ്​ ആരംഭിക്കു​േമ്പാൾ ഇൗ രാജ്യങ്ങളിൽനിന്ന്​ ഒഴികെയുള്ള യാത്രക്കാർക്ക്​ കുവൈത്തിലേക്ക്​ വരാൻ മന്ത്രിസഭ അനുമതി നൽകിയതായി ഗവൺമ​െൻറ്​ കമ്യൂണിക്കേഷൻ സ​െൻറർ വ്യക്​തമാക്കി. കുവൈത്ത്​ വ്യോമയാന വകുപ്പും ഇക്കാര്യം ട്വിറ്ററിലൂടെ സ്ഥിരീകരിച്ചിട്ടുണ്ട്​. അവധിക്ക്​ നാട്ടിൽ പോയി വിമാന സർവീസ്​ നിലച്ചതിനാൽ തിരിച്ചുവരാൻ കഴിയാതെ കുടുങ്ങിയ ആയിരക്കണക്കിന്​ പ്രവാസികൾക്ക്​ തിരിച്ചടിയാണ്​ തീരുമാനം. നാലര മാസമായി കുടുങ്ങിക്കിടക്കുന്ന ഇവർ ആഗസ്​റ്റിൽ വിമാന സർവീസ്​ ആരംഭിക്കുമെന്ന പ്രതീക്ഷയിലായിരുന്നു. ഇതിൽ ചിലരുടെ കുടുംബം കുവൈത്തിലാണുള്ളത്​. അടിയന്തരാവശ്യങ്ങൾക്ക്​ രണ്ടോ മൂന്നോ ദിവസത്തേക്ക്​ പോയി കുടുങ്ങിയവരാണിവർ. ഇനിയും തിരിച്ചെത്താൻ കഴിഞ്ഞില്ലെങ്കിൽ ജോലി നഷ്​ട ഭീഷണി നേരിടുന്ന നിരവധി പേരാണുള്ളത്​. വ്യോമ ഗതാഗതം പുനരാരംഭിക്കുന്നതുമായി ബന്ധപ്പെട്ട്​ കഴിഞ്ഞ ദിവസം ഇന്ത്യൻ, കുവൈത്ത്​ വ്യോമയാന വകുപ്പ്​ ചർച്ച നടത്തിയതായി കേന്ദ്ര വ്യോമയാന മന്ത്രി ഹർദീപ്​ സിങ്​ പുരി ട്വീറ്റ്​ ചെയ്​തിരുന്നു. 

അതുകൊണ്ടുതന്നെ വൈകാതെ പ്രശ്​നം പരിഹരിച്ച്​ പ്രവാസികൾക്ക്​ കുവൈത്തിലേക്ക്​ തിരിച്ചുവരവിന്​ കളമൊരുങ്ങുമെന്നാണ്​ പ്രതീക്ഷ. അതേസമയം, ഏഴുരാജ്യങ്ങളിൽനിന്ന്​ വരുന്നവർക്ക്​ പ്രവേശന വിലക്ക്​ ഏർപ്പെടുത്തിയത്​ ​പൗരത്വത്തി​​െൻറ അടിസ്ഥാനത്തിലല്ലെന്നും നേരിട്ട്​ കുവൈത്തിലേക്ക്​ വരാതെ വിലക്കില്ലാത്ത രാജ്യങ്ങളിൽ 14 ദിവസം താമസിച്ചതിന്​ ശേഷം വരുന്നതിന്​ തടസ്സമില്ലെന്നും വ്യോമയാന വകുപ്പ്​ വ്യക്​തമാക്കി.

അങ്ങനെ വരു​േമ്പാൾ അവരെന്ത്​ ചെയ്യും...
കുവൈത്തിൽ വരാനാവാതെ നാട്ടിൽ കുടുങ്ങിയവർക്ക്​ നിരാശ
കുവൈത്ത്​ സിറ്റി: ഇന്ത്യയടക്കം ഏഴ്​ രാജ്യങ്ങളിൽനിന്നുള്ളവർക്ക്​ കുവൈത്തിൽ പ്രവേശന വിലക്ക്​ ഏർപ്പെടുത്തിയ വാർത്ത ഞെട്ട​ലോടെയാണ്​ പ്രവാസികൾ കേട്ടത്​. കോവിഡ്​ പശ്ചാത്തലത്തിൽ സ്വീകരിച്ച താൽക്കാലിക നടപടിയെന്ന്​ ആശ്വസിക്കാമെങ്കിലും നിരവധി പേരെയാണ്​ ഇത്​ ബാധിക്കുന്നത്​. അവധിക്ക്​ നാട്ടിൽ പോയി വിമാന സർവിസ്​ നിലച്ചതിനാൽ തിരിച്ചുവരാൻ കഴിയാതെ പതിനായിരങ്ങളാണ്​ കുടുങ്ങിയത്​. പലരും ജോലി നഷ്​ട ഭീഷണി നേരിടുന്നു. ആഗസ്​റ്റിൽ വിമാന സർവിസ്​ ആരംഭിച്ചാൽ തിരിച്ചുവരാമെന്ന്​ പ്രതീക്ഷിച്ച്​ കാത്തിരിക്കുന്നവർക്ക്​ പൂർണ നിരാശയാണ്​​. കുവൈത്ത്​ എയർവേസും ജസീറ എയർവേസും ഇന്ത്യയടക്കം രാജ്യങ്ങളിൽനിന്ന്​ ബുക്കിങ്​ ആരംഭിച്ച്​ നിരവധി പേർ ടിക്കറ്റ്​ എടുക്കുകയും ചെയ്​തു. നാട്ടിൽ കുടുങ്ങിയ പ്രവാസികൾ കടുത്ത മാനസിക സംഘർഷത്തിലാണ്​. മാസങ്ങളായി ജോലിയും വരുമാനവും ഇല്ലാതെയും ഭാവി സംബന്ധിച്ച്​ ഒരു രൂപവും ഇല്ലാതെയും കടുത്ത നിരാശയിലാണ്​ ഇവർ. 

നാട്ടിൽ കോവിഡ്​ വ്യാപിക്കുന്നതും കുവൈത്തിൽ സ്ഥിതി പതിയെ നിയന്ത്രണ വിധേയമാവുകയുമാണ്​​. അടിയന്തരാവശ്യങ്ങൾക്ക്​ രണ്ടോ മൂന്നോ ദിവസത്തെ ഹ്രസ്വകാല അവധിയിൽ പോയവർ മുതൽ പതിവ്​ വാർഷികാവധിക്ക്​ പോയവർ വരെ നാട്ടിൽ കുടുങ്ങിക്കിടക്കുന്നു. ചിലരുടെ കുടുംബം ഇവിടെ കുടുങ്ങിക്കിടക്കുന്നു.

കഴിഞ്ഞ മാസങ്ങളിലെ അനിശ്ചിതത്വം നിറഞ്ഞ സാഹചര്യത്തിൽ കുടുംബനാഥൻ കൂടെയില്ലാതെ അവർ കഴിച്ചുകൂട്ടിയത്​ ഏറെ പ്രയാസം സഹിച്ചാണ്​. മാർച്ച്​ ഏഴിനാണ്​ കുവൈത്ത്​ ഇന്ത്യ ഉൾപ്പെടെ ഏഴു​ രാജ്യങ്ങ​ളിലേക്കും തിരിച്ചുമുള്ള വിമാന സർവിസ്​ നിർത്തിയത്​. കോവിഡ്​ പ്രതിരോധ ഉപകരണങ്ങൾ വിമാനത്താവളത്തിൽ സ്ഥാപിക്കാൻ​ ഒരാഴ്​ചത്തേക്ക്​ നിർത്തുന്നു എന്നായിരുന്നു പ്രഖ്യാപനമെങ്കിലും കോവിഡ്​ പ്രതിസന്ധി മൂർച്ഛിച്ചതിനാൽ പിന്നീട്​ പുനഃസ്ഥാപിച്ചില്ല. ഇതിനിടക്ക്​ കുവൈത്തിൽനിന്ന്​ നാട്ടിലേക്ക്​ ​ചാർ​േട്ടഡ്​ വിമാന സർവിസുകൾ ആരംഭിച്ചു. പൊതുമാപ്പ്​ പ്രയോജനപ്പെടുത്തിയവരെയും പ്രത്യേക വിമാനങ്ങളിൽ നാട്ടിലെത്തിച്ചു. 

എന്നാൽ, നാട്ടിൽ കുടുങ്ങിയവർക്ക്​ ഇങ്ങോട്ടുവരാൻ വഴിയില്ല. ഏതാനും ദിവസം കൊണ്ട്​ ശരിയാവുമെന്ന്​ പ്രതീക്ഷിച്ചിരുന്നവർ പ്രതിസന്ധി മാസങ്ങൾ നീണ്ടതോടെ പൂർണമായി നിരാശരായി. അതിനിടക്കാണ്​ ആശ്വാസ കിരണമായി ആഗസ്​റ്റിൽ കമേഴ്​സ്യൽ വിമാന സർവിസ്​ ആരംഭിക്കുന്നതായ പ്രഖ്യാപനം വന്നത്​. അതിൽ പ്രതീക്ഷയർപ്പിച്ചിരിക്കെയാണ്​ വ്യാഴാഴ്​ച പുലർച്ച പ്രവേശന വിലക്കി​​െൻറ വാർത്ത വന്നത്​.