തായ്​ലൻഡിൽ ചികിത്സയിലിരുന്ന കുവൈത്തികളെ പ്രത്യേക വിമാനത്തിൽ കൊണ്ടുവന്നു

കുവൈത്ത്​ സിറ്റി: തായ്​ലൻഡിൽ ചികിത്സയിലുണ്ടായിരുന്ന കുവൈത്തികളെ ​കുവൈത്ത്​ വ്യോമസേനയുടെ പ്രത്യേക വിമാനത്തിൽ തിരിച്ചെത്തിച്ചു. ആധുനിക ചികിത്സ ഉപകരണങ്ങൾ സംവിധാനിച്ച പ്രത്യേക വിമാനത്തിലാണ്​ ചികിത്സയിലുള്ളവരെയും കൂട്ടിന്​ പോയവരെയും കൊണ്ടുവന്നത്​. കുവൈത്ത്​ ആരോഗ്യ മന്ത്രാലയത്തിന്​ കീഴിലുള്ള മെഡിക്കൽ സർവീസസ്​ അതോറിറ്റിയിലെ മെഡിക്കൽ ജീവനക്കാരുമുണ്ടായിരുന്നു.

വിമാനത്താവളത്തിൽ അത്യാവശ്യ വൈദ്യ പരിശോധനകൾ പൂർത്തിയാക്കിയശേഷം ശൈഖ്​ ജാബിർ ആശുപത്രിയിലേക്കും മറ്റു ആശുപത്രിയിലേക്കും മാറ്റി. കുവൈത്ത്​ പൗരന്മാരെ വിദേശ രാജ്യങ്ങളിൽ ചികിത്സക്കയക്കുന്നത്​ താൽക്കാലികമായി നിർത്തിവെക്കാൻ തീരുമാനിച്ചിട്ടുണ്ട്​. കോവിഡ്​ പശ്ചാത്തലത്തിലെ സാമ്പത്തിക പ്രതിസന്ധിയാണ്​ തീരുമാനത്തിന്​ അടിസ്ഥാനം.

വിദേശത്തെ ആശുപത്രികളിൽ നേര​േത്ത നടത്തിയ ചികിത്സയുടെ ഭാഗമായി കുടിശ്ശികയുണ്ട്​. നിലവിൽ കുവൈത്തികൾ ചികിത്സയിൽ കഴിയുന്ന അമേരിക്ക, ബ്രിട്ടൻ, ഫ്രാൻസ്​, തായ്​ലൻഡ്​, യു.എ.ഇ എന്നിവിടങ്ങളിലെ ആശുപത്രിയിലാണ്​ കുടിശ്ശികയുള്ളത്​. ആരോഗ്യ മന്ത്രാലയത്തിന്​ ധനമന്ത്രാലയത്തിൽനിന്ന്​ ആവശ്യത്തിന്​ സാമ്പത്തികസഹായം ലഭിക്കാത്തതാണ്​ പ്രതിസന്ധിക്ക്​ കാരണം. കോവിഡ്​ പ്രതിസന്ധിയിൽ കുവൈത്തി​െൻറ മുഖ്യവരുമാനമായ പെട്രോളിയം വില കൂപ്പുകുത്തിയത് ചെലവുചുരുക്കാൻ രാജ്യത്തെ നിർബന്ധിതരാക്കി.