വിദേശത്തുള്ള കുവൈത്തികളെ നാളെ മുതൽ തിരിച്ചെത്തിക്കും

കുവൈത്ത്​ സിറ്റി: വിവിധ രാജ്യങ്ങളിലുള്ള കുവൈത്ത്​ പൗരന്മാരെ തിരിച്ചെത്തിക്കാൻ കുവൈത്ത്​ വിദേശകാര്യ മന്ത്രാലയം പദ്ധതി തയാറാക്കി. ചൊവ്വാഴ്​ച മുതൽ കുവൈത്ത്​ എയർവേയ്​സ്​ വിമാനത്തിൽ ആളുകളെ എത്തിച്ചുതുടങ്ങുമെന്നാണ്​ റിപ്പോർട്ട്​. ദേശീയ ദിനാഘോഷ ഭാഗമായി വിദേശത്തുപോയ പതിനായിരങ്ങൾ വിവിധ രാജ്യങ്ങളിൽ കുടുങ്ങിക്കിടക്കുന്നതായാണ്​ വിവരം. തുർക്കി, ഇൗജിപ്​ത്​, ബ്രിട്ടൻ എന്നിവിടങ്ങളിലാണ്​ കൂടുതൽ പേർ ഉള്ളത്​.
സ്​പെയിൻ, അമേരിക്ക, ജോർജിയ, ഗൾഫ്​ രാജ്യങ്ങൾ, അസർബൈജാൻ തുടങ്ങിയ കൊറോണ വൈറസ്​ സാന്നിധ്യം കണ്ടെത്തിയ പല രാജ്യങ്ങളിലും കുവൈത്തികളുണ്ട്​. വിദേശത്തുള്ള കുവൈത്തികളിൽ ഇതിനകം വൈറസ്​ സ്ഥിരീകരിച്ചവരുമുണ്ടെന്നാണ്​ വിവരം. അതത്​ രാജ്യങ്ങളിലെ കുവൈത്ത്​ എംബസി ഇവരുമായി ബന്ധപ്പെടുന്നുണ്ട്​.

തിരിച്ചെത്തുന്നവരെ പരിശോധിക്കാൻ കുവൈത്ത്​ വിമാനത്താവളത്തിൽ വിപുലമായ സംവിധാനങ്ങളാണ്​ ഏർപ്പെടുത്തിയിട്ടുള്ളത്​. പരിശോധനയിൽ വൈറസ്​ ബാധ കണ്ടെത്തുന്നവരെ ചികിത്സക്കായി ആരോഗ്യ മന്ത്രാലയം ഏറ്റെടുക്കും. അല്ലാത്തവർക്ക്​ കർശന വീട്ടുനിരീക്ഷണം ഏർപ്പെടുത്തും. ഇവർക്കുമേൽ ആരോഗ്യ മന്ത്രാലയത്തി​​െൻറ മേൽനോട്ടമുണ്ടാവും.

ഇതുവരെ വിദേശത്തുനിന്ന്​ സ്വദേശികളെ എത്തിച്ചിരുന്നത്​ സഅദ്​ അൽ അബ്​ദുല്ല ടെർമിനൽ വഴിയായിരുന്നെങ്കിൽ കൂടുതൽ പേർ ഉള്ളതിനാൽ കുവൈത്ത്​ എയർവേയ്​സ്​ ടെർമിനൽ വഴി കൊണ്ടുവരാനാണ്​ ഇപ്പോൾ ആലോചിക്കുന്നത്​. വൈറസ്​ പരിശോധന സംവിധാനങ്ങൾ സജ്ജീകരിച്ചിട്ടുള്ളത്​ ഇവിടെയാണ്​.