സിറ്റി ബസ്ചാര്‍ജ് വര്‍ധിപ്പിച്ചു; കെ.പി.ടി.സി, കെ.ജി.എല്‍ എന്നിവക്ക് നിലവിലെ നിരക്ക്

കുവൈത്ത് സിറ്റി: കുവൈത്ത് പ്രമുഖ പബ്ളിക് ബസായ സിറ്റി ബസ് യാത്രാനിരക്ക് വര്‍ധിപ്പിച്ചു. 200 ഫില്‍സ് 250 ആയും 250 ഫില്‍സ് 300 ആയും 300 ഉള്ളത് 350 ആയുമാണ് വര്‍ധിപ്പിച്ചത്.
 അതേസമയം, കെ.ജി.എല്‍, സര്‍ക്കാര്‍ ഉടമസ്ഥതയിലുള്ള കെ.പി.ടി.സി എന്നിവ നിരക്ക് വര്‍ധിപ്പിച്ചിട്ടില്ല. 
ഇന്ധന വില വര്‍ധനവിനെ തുടര്‍ന്ന് ബസ് ചാര്‍ജ് വര്‍ധിപ്പിക്കാന്‍ സര്‍ക്കാര്‍ അനുമതി നല്‍കിയിരുന്നെങ്കിലും ഇതുവരെ കമ്പനികള്‍ പഴയനിരക്ക് തന്നെയാണ് ഈടാക്കിയിരുന്നത്. ബസ് സര്‍വിസിനെ ആശ്രയിക്കുന്നത് വിദേശികളായതിനാല്‍ നിരക്ക് വര്‍ധന അവര്‍ക്ക് തിരിച്ചടിയാണ്. 
ഇന്ധനവില വര്‍ധനവിനെ തുടര്‍ന്ന് പൊതുവെ ജീവിതച്ചെലവേറിയ സാഹചര്യത്തില്‍ രാജ്യത്ത് ഏറ്റവും കൂടുതല്‍ സര്‍വിസ് നടത്തുന്ന സിറ്റി ബസ് നിരക്ക് കൂട്ടിയത് ആഘാതമാണ്. അതേസമയം, മറ്റു രണ്ട് കമ്പനികള്‍ നിരക്ക് വര്‍ധിപ്പിക്കാത്തത് ആശ്വാസവുമാണ്. ചില്ലറക്ഷാമമാണ് ബസ് ചാര്‍ജ് വര്‍ധനയുടെ പ്രധാന ബുദ്ധിമുട്ട്. നിലവില്‍ ഏറ്റവുമധികം ആളുകള്‍ സഞ്ചരിക്കുന്നത് 250 ഫില്‍സിന്‍െറ ദൂരപരിധിയിലാണ്. ഇത് 300 ആക്കുന്നതോടെ 50 ഫില്‍സിന്‍െറ ക്ഷാമം നേരിടാനിടയുണ്ട്. കണ്ടക്ടര്‍മാരില്ലാതെ ഡ്രൈവര്‍ തന്നെ ടിക്കറ്റ് നല്‍കുന്ന സംവിധാനത്തില്‍ ചില്ലറ കൈകാര്യം ചെയ്യല്‍ ഡ്രൈവര്‍മാര്‍ക്കും ബുദ്ധിമുട്ടാണ്.