ഭാരതീയ പ്രവാസി പരിഷത്ത് കുവൈത്ത്  റിപ്പബ്ളിക്ദിനം ആഘോഷിച്ചു

കുവൈത്ത് സിറ്റി: ഭാരതീയ പ്രവാസി പരിഷത്തിന്‍െറ നേതൃത്വത്തില്‍ 68ാമത് റിപ്പബ്ളിക് ദിനാഘോഷം സംഘടിപ്പിച്ചു. അബ്ബാസിയ ജംഇയ്യ ഹാളില്‍ നടന്ന പരിപാടിയില്‍ വിശിഷ്ടാതിഥിയായി എത്തിയ മേജര്‍ പ്രവീണ്‍ രാജ് ഭദ്രദീപം കൊളുത്തി സമ്മേളനം ഉദ്ഘാടനം ചെയ്തു. വിശ്വ ഗുരു ഭാരതം എന്ന വിഷയത്തെ മുന്‍നിര്‍ത്തി ഡോ. ആസാദ് സാഹേബ് മുഖ്യപ്രഭാഷണം നടത്തി. ബി.പി.പി പ്രസിഡന്‍റ് രാജശേഖരന്‍ അധ്യക്ഷത വഹിച്ചു. ഭാരതത്തിന്‍െറ ഐക്യവും സംസ്കാരവും ദൃശ്യമാക്കുന്ന ഗാനങ്ങളും സംഗീതവും നൃത്തനൃത്യങ്ങളും മറ്റു കലാപരിപാടികളുമുണ്ടായി. പ്രോഗ്രാം കണ്‍വീനര്‍ രാജ് ഭണ്ഡാരി സ്വാഗതവും അല്‍ദേശ് പട്ടേല്‍ നന്ദിയും പറഞ്ഞു. ഇന്ത്യന്‍ സമൂഹത്തിലെ വിവിധ സംസ്ഥാനങ്ങള്‍ക്കിടയില്‍ പ്രവര്‍ത്തിക്കുന്ന തുളുക്കൂട്ടം, കന്നഡക്കൂട്ടം, ബില്ലവസംഘം, മൗര്യ പരിഷത്ത് ബിഹാര്‍, ഉപകാര്‍ സമര്‍പ്പണ്‍ ഗുജറാത്ത്, മഹാരാഷ്ട്ര മണ്ഡലി, ബണ്‍സ് കുവൈത്ത്, കെ.സി.ഡബ്ള്യൂ തുടങ്ങിയ സംഘടനകള്‍ പങ്കെടുത്തു.