വ്യാപാരം ശക്​തമാക്കൽ: ഇന്ത്യയും കുവൈത്തും ചർച്ചനടത്തി

കുവൈത്ത്​ സിറ്റി: ഇന്ത്യയും കുവൈത്തും​ വ്യാപാരവുമായി ബന്ധപ്പെട്ട വിഷയങ്ങൾ ചർച്ച ചെയ്​തു. കേന്ദ്ര വാണിജ്യ വ്യവസായ മന്ത്രി പിയൂഷ്​ ഗോയലും കുവൈത്ത്​ വാണിജ്യമന്ത്രി ഖാലിദ്​ അൽ റൗദാനുമാണ്​ ഒാൺലൈനിലൂടെ ചർച്ച നടത്തിയത്​. വ്യാപാരബന്ധം ശക്​തിപ്പെടുത്തുന്നതുമായി ബന്ധപ്പെട്ട ചില പ്രഖ്യാപനങ്ങൾ വൈകാതെ ഉണ്ടാവുമെന്ന്​ കുവൈത്ത്​ വാണിജ്യമന്ത്രാലയം സൂചന നൽകി. ഇന്ത്യയിൽ അടിസ്ഥാന സൗകര്യ വികസന മേഖലയിൽ കുവൈത്ത്​ ഇൻവെസ്​റ്റ്​മ​െൻറ്​ അതോറിറ്റി വൻ നിക്ഷേപത്തിനൊരുങ്ങുന്നതായി നേരത്തേ റിപ്പോർട്ടുണ്ടായിരുന്നു.

ലോകത്തിലെ അഞ്ചാമത്​ വലിയ സ്വതന്ത്ര നിക്ഷേപ നിധികളിലൊന്നായ കുവൈത്ത്​ ഇൻവെസ്​റ്റ്​​മ​െൻറ്​ അതോറിറ്റി ഇന്ത്യയിൽ 500 കോടി ഡോളറി​​െൻറ നിക്ഷേപത്തിനാണൊരുങ്ങുന്നതെന്ന്​​ ഉന്നത വൃത്തങ്ങൾ സൂചിപ്പിച്ചിരുന്നു​. വിമാനത്താവള, ഹൈവേ, മറ്റു അടിസ്ഥാനസൗകര്യ വികസന രംഗങ്ങളിൽ കുവൈത്ത്​ നിക്ഷേപം നടത്തും. ഇന്ത്യയും കുവൈത്തുമല്ലാത്ത മൂന്നാമതൊരു രാജ്യത്തിൽ സംയുക്​ത നിക്ഷേപ പദ്ധതിക്ക്​ കുവൈത്ത്​ സർക്കാർ ഇന്ത്യക്കുമുന്നിൽ നിർദേശം സമർപ്പിച്ചതായും റിപ്പോർട്ടുണ്ട്​. കിഴക്കൻ യൂറോപ്പിൽ റിയൽ എസ്​റ്റേറ്റ്​, ഭവനപദ്ധതികൾ, സ്വതന്ത്ര സാമ്പത്തികമേഖല എന്നിവയിൽ സംയുക്​ത നിക്ഷേപം നടത്താനാണ്​ കുവൈത്ത്​ താൽപര്യം പ്രകടിപ്പിച്ചത്​.