നോമ്പുതുടങ്ങാൻ ദിവസങ്ങൾ മാത്രം; ഒരുക്കത്തിൽ അനിശ്ചിതത്വം

കുവൈത്ത്​ സിറ്റി: റമദാൻ മാസം തുടങ്ങാൻ ദിവസങ്ങൾ മാത്രം ശേഷിക്കെ ഒരുക്കം സംബന്ധിച്ച്​ അനിശ്ചിതത്വം. കോവിഡ്​ പ ്രതിരോധ നടപടികളുടെ ഭാഗമായുള്ള നിയന്ത്രണങ്ങൾ കാരണം നോമ്പുതുറക്കുള്ള സന്നാഹങ്ങൾ ഉൾപ്പെടെ കാര്യങ്ങളിൽ അനിശ് ചിതത്വമുണ്ട്​. പള്ളികളിലും തമ്പുകളിലുമായി റമദാന്‍ മാസം നടത്തിവരുന്ന നോമ്പുതുറ പരിപാടികൾ ഇത്തവണ ഉണ്ടാവില്ലെ ന്ന്​ ഒാഖാഫ്​ മന്ത്രാലയം വ്യക്​തമാക്കിയിട്ടുണ്ട്​.

സംഘടനകളുടെ ഇഫ്​താർ സംഗമങ്ങൾക്കും മറ്റു പൊതു പരിപാടികൾക്കും വിലക്കുണ്ട്​. ഒൗഖാഫ്​ മന്ത്രാലയം പള്ളികളിൽ ഒരുക്കിയിരുന്ന നോമ്പുതുറ സൗകര്യം ലക്ഷക്കണക്കിന്​ ആളുകളാണ്​ ഉപയോഗപ്പെടുത്തിയിരുന്നത്​. ചെറിയ വരുമാനക്കാരായ തൊഴിലാളികൾക്ക്​ ഇത്​ വലിയ ആശ്വാസമായിരുന്നു. ഇപ്പോൾ കോവിഡ്​ പ്രതിരോധ നടപടികളുടെ ഭാഗമായി ജോലിയും വരുമാനവുമില്ലാതെ വീട്ടിലിരിക്കുന്നവർ നിരവധിയാണ്​. ദൈനംദിന ഭക്ഷണാവശ്യത്തിന്​ തന്നെ സംഘടനകൾ എത്തിക്കുന്ന കിറ്റുകളെയാണ്​ പലരും ആശ്രയിക്കുന്നത്​.

ഇവർക്ക്​ നോമ്പുതുറ വിഭവങ്ങൾ ലഭ്യമാക്കൽ വലിയ ദൗത്യമാണ്​. നോമ്പുതുറക്ക് തയാറാക്കുന്ന കിറ്റുകള്‍ വിതരണം ചെയ്യുന്നതിന്​ വിലക്കില്ല. ജനങ്ങള്‍ ഒരുമിച്ചു കൂടാത്ത രീതിയിലായിരിക്കണം കിറ്റുകള്‍ വിതരണം ചെയ്യേണ്ടത്. വൈകീട്ട്​ അഞ്ചുമണി മുതൽ കർഫ്യൂ നിലനിൽക്കുന്നതിനാൽ ഭക്ഷണമെത്തിക്കൽ നേരത്തെയാക്കേണ്ടി വരും. നിലവിലെ സാഹചര്യത്തിൽ വിഭവ സമാഹരണത്തിന്​ പരിമിതിയുള്ളതിനാൽ എത്ര പേർക്ക്​ ഇങ്ങനെ എത്തിക്കാൻ കഴിയും എന്നതും ചോദ്യമാണ്​.

പള്ളികൾ അടച്ചിട്ടിരിക്കുന്നതിനാൽ തറാവീഹും മറ്റു സംഘടിത നമസ്​കാരങ്ങളും ഉണ്ടാവില്ല. റമദാനില്‍ നടത്തിവരുന്ന എല്ലാവിധ സംഘടനാ പരിപാടികൾക്കും അനുമതിയുണ്ടാവില്ലെന്ന്​ ഒൗഖാഫ്​ മന്ത്രി ഡോ. ഫഹദ് അല്‍ അഫാസി നേരത്തെ അറിയിച്ചിരുന്നു. ഔഖാഫ് മന്ത്രാലയത്തി​​െൻറ സന്ദേശങ്ങള്‍ സാമൂഹിക മാധ്യമങ്ങളിലൂടെയും ടി.വി ചാനലുകളിലൂടെയും അറിയിക്കും.