പൊതുമാപ്പ്​: ബംഗ്ലാദേശുകാരുടെ രജിസ്​ട്രേഷൻ ബുധനാഴ്​ച അവസാനിക്കും

കുവൈത്ത്​ സിറ്റി: കുവൈത്തിൽ ബംഗ്ലാദേശ്​ പൗരന്മാരുടെ പൊതുമാപ്പ്​ രജിസ്​ട്രേഷൻ ബുധനാഴ്​ച അവസാനിക്കും. ഏപ്രി ൽ 11 മുതൽ 15 വരെയാണ്​ ബംഗ്ലാദേശികളുടെ രജിസ്​ട്രേഷൻ. നേരത്തേ ഇന്ത്യക്കാർക്കാണ്​ ഇൗ തീയതി നിശ്ചയിച്ചതെങ്കിലും ഇന് ത്യക്കാരുടെ രജിസ്​ട്രേഷൻ ഏപ്രിൽ 16 മുതൽ 20 വരെയാക്കി​. ഇന്ത്യയിൽ ഏപ്രിൽ 14 വരെ ലോക്ഡൗൺ നിലവിലുള്ള പശ്ചാത്തലത്തിൽ ​തിരിച്ചുകൊണ്ടുപോവൽ പ്രയാസമായതിനാൽ തീയതി മാറ്റാൻ ഇന്ത്യൻ എംബസി ആവശ്യപ്പെടുകയായിരുന്നു. എന്നാൽ, ഇന്ത്യയിൽ ലോക്ഡൗൺ നീട്ടുകയും വിമാന സർവിസ്​ ആരംഭിക്കാൻ മേയ്​ വരെ കാത്തിരിക്കണമെന്ന്​ ഇന്ത്യൻ ഭരണകൂടം വ്യക്​തമാക്കുകയും ചെയ്​ത പശ്ചാത്തലത്തിൽ ഇന്ത്യക്കാരുടെ യാത്രയിൽ അനിശ്ചിതത്വം തുടരുകയാണ്​.

ലഗേജും രേഖകളുമായി എത്തി രജിസ്​ട്രേഷൻ പൂർത്തിയായാൽ പിന്നീട്​ പുറത്തേക്ക്​ വിടുന്നില്ല. നടപടിക്രമങ്ങൾ പൂർത്തിയാക്കിയാൽ യാത്ര ദിവസം വരെ കുവൈത്ത്​ അധികൃതർ താമസവും ഭക്ഷണവും നൽകും. ഇന്ത്യയിലേക്കുള്ള വിമാന സർവിസ്​ ആരംഭിക്കാൻ സമയമെടുക്കുകയും ദീർഘകാലം ക്യാമ്പിൽ കഴിയേണ്ടിവരുകയും ചെയ്യുമോ എന്ന ആശങ്കയുണ്ട്​. ഫിലിപ്പീൻസ്​, ഇൗജിപ്​ത്​ പൗരന്മാരുടെ രജിസ്​ട്രേഷനിൽ പ്രതീക്ഷിച്ച തിരക്ക്​ ഉണ്ടായില്ല.

1370 ബംഗ്ലാദേശികൾ തിങ്കളാഴ്​ച രജിസ്​റ്റർ ചെയ്​തു. അടുത്ത രണ്ടു​ ദിവസം കൂടി ചേർത്താൽ 6000ത്തോളം പേരെ ആകൂവെന്നാണ്​ കണക്കുകൂട്ടൽ. 2200 ഫിലിപ്പീൻസുകാരും 5000ത്തോളം ഇൗജിപ്​തുകാരുമാണ്​ പൊതുമാപ്പ്​ പ്രയോജനപ്പെടുത്താൻ മുന്നോട്ടുവന്നത്​. ഇത്​ അർഹരായവരുടെ നാലിലൊന്നേ വരൂ. പൊതുമാപ്പ്​ കാലം കഴിഞ്ഞാൽ കർശന പരിശോധന നടത്തി നിയമലംഘകരെ പിടികൂടി നാടുകടത്തുമെന്ന്​ ആഭ്യന്തരമ​ന്ത്രി മുന്നറിയിപ്പ്​ നൽകിയിട്ടുണ്ട്​.