കോവിഡ്​: വരുമാനം നിലച്ചത്​ രണ്ടര ലക്ഷം പേർക്ക്​

കുവൈത്ത്​ സിറ്റി: കോവിഡ്​ പ്രതിസന്ധിയിൽ കുവൈത്തിൽ വരുമാനം നിലച്ചത്​ രണ്ടരലക്ഷം വിദേശ തൊഴിലാളികൾക്കെന്ന് ​ റിപ്പോർട്ട്​. സർക്കാർവൃത്തങ്ങളെ ഉദ്ധരിച്ച്​ അൽഖബസ്​ ദിനപത്രമാണ്​ ഇക്കാര്യം റിപ്പോർട്ട്​ ചെയ്​തത്​. ഇവരി ലധികവും ചെറിയ വരുമാനക്കാരായ അവിദഗ്​ധ തൊഴിലാളികളാണ്​. കടകൾ അടച്ചിട്ടതും ബസ്​ ടാക്​സി സർവിസുകൾ നിലച്ചതും കർഫ്യൂ, ലോക്​ഡൗൺ തുടങ്ങിയ കോവിഡ്​ പ്രതിരോധനടപടികളുമാണ്​ ​ജോലി നഷ്​ടത്തിന്​ വഴിവെച്ചത്​. ഇപ്പോൾ നിയന്ത്രിതമായി പ്രവർത്തിക്കുന്ന സ്വ​കാര്യ കമ്പനികളിൽ നിരവധി പേർ ജോലിനഷ്​ട ഭീഷണി നേരിടുന്നുണ്ട്​.

ബാർബർ ഷോപ്പുകൾ, മൊബൈൽ ഫോൺ കടകൾ, ടെക്​സ്​​റ്റൈൽസുകൾ, വർക് ഷോപ്പുകൾ, ക​േഫകൾ, വിനോദകേന്ദ്രങ്ങൾ, സ്​പെയർപാർട്​സ്​ കടകൾ തുടങ്ങിയവയെല്ലാം അടച്ചിട്ടിരിക്കുകയാണ്​. ദിവസവേതനക്കാരായ തയ്യൽ ​തൊഴിലാളികൾ, സ്വന്തംനിലക്ക്​ ​പണിയെടുത്ത്​ ജീവിച്ചിരുന്ന ഇലക്​ട്രീഷ്യന്മാർ, പ്ലംബർമാർ, മെക്കാനിക്കുകൾ, ഫാബ്രിക്കേഷൻ തൊഴിലാളികൾ തുടങ്ങി നിരവധിപേരുടെ വരുമാനം നിലച്ചു.

വിദേശികൾക്കിടയിൽ കോവിഡ്​ വ്യാപകമായതോടെ ഇത്തരം പണിക്കാരെ ഇപ്പോൾ വിളിക്കുന്നില്ല. പലരും കൈയിലുള്ള പണം തീർന്ന്​ ഭക്ഷണത്തിനും വാടകക്കും പ്രയാസപ്പെടുകയാണ്​. ഇന്നോളം ഒരാളോടും ചോദിച്ച്​ അനുഭവമില്ലാത്തവർവരെ ഭക്ഷണത്തിനായി സന്നദ്ധസംഘടനകളെ ബന്ധപ്പെടുന്നു. ഇവരിൽ സാമാന്യം ഉയർന്ന നിലയിൽ ജോലിചെയ്​തിരുന്നവർ വരെയുണ്ട്​.