നഴ്​സ്​, ആരോഗ്യപ്രവർത്തകരെ സ്​കൂളുകളിൽ പാർപ്പിക്കും

കുവൈത്ത്​ സിറ്റി: നഴ്​സുമാരെയും മറ്റ്​ ആരോഗ്യപ്രവർത്തകരെയും പൊതു ആശുപത്രികൾക്കു​ സമീപമുള്ള സ്​കൂളുകളിൽ പാർപ്പിക്കാൻ നീക്കം. താമസസൗകര്യം ഒരുക്കാൻ ആരോഗ്യ മന്ത്രാലയം, പൊതുമരാമത്ത്​ മന്ത്രാലയം, വിദ്യാഭ്യാസ മന്ത്രാ ലയം, മറ്റു വകുപ്പുകൾ എന്നിവിടങ്ങളിലെ പ്രതിനിധികൾ അടങ്ങിയ പ്ര​ത്യേകസംഘം രൂപവത്​കരിച്ചു.

വിദ്യാഭ്യാസ മ​ന്ത്രാലയം സ്​കൂളുകൾ വിട്ടുനൽകാമെന്ന്​ അറിയിച്ചിട്ടുണ്ട്​. പൊതുമരാമത്ത്​ മന്ത്രാലയം മറ്റു സജ്ജീകരണങ്ങൾ ഒരുക്കും. ആരോഗ്യ മന്ത്രാലയം ആരോഗ്യ സുരക്ഷാ മാനദണ്ഡങ്ങൾ പരിശോധിച്ച്​ ഉറപ്പാക്കും. പൊതുസുരക്ഷക്ക്​ ​പൊലീസി​​െൻറ മേൽനോട്ടമുണ്ടാവും. കോവിഡ്​ രോഗികളുമായി ഇടപഴകുന്ന ആരോഗ്യപ്രവർത്തകർ താമസകേ​ന്ദ്രങ്ങളിൽ മറ്റുള്ളവർക്കൊപ്പം ക​ഴിയുന്നത്​ വൈറസ്​ വ്യാപന സാധ്യത വർധിപ്പിക്കും എന്നതിനാലാണ്​ ഇവർക്ക്​ പ്രത്യേക താമസസൗകര്യമൊരുക്കാൻ തീരുമാനിച്ചത്​.

കോവിഡ്​ ബാധിതരെ പരിചരിക്കുന്ന നിരവധി നഴ്​സുമാർ ഇപ്പോൾ സ്വന്തം കുട്ടികളെ പിരിഞ്ഞ്​ തനിച്ചു​ താമസിക്കുകയോ കുട്ടികളെ ബന്ധുവീടുകളിലേക്ക്​ മാറ്റിയിരിക്കുകയോ ആണ്​. ഇതിന്​ കഴിയാത്തവർ ഭീതിയോടെയാണ്​ ദിവസങ്ങൾ തള്ളിനീക്കുന്നത്​. അതേസമയം, സ്​കൂളുകളിൽ താമസ സൗകര്യമൊരുക്കിയാലും എത്രനാൾ ഉറ്റവരെ പിരിഞ്ഞ്​ മാറിത്താമസിക്കേണ്ടിവരും എന്നത്​​ സംബന്ധിച്ച്​ അനിശ്ചിതത്വമുണ്ട്​.