കർഫ്യൂ ഇളവുകാർക്ക്​ ബാർ കോഡ്​ സംവിധാനം

കുവൈത്ത്​ സിറ്റി: കുവൈത്തിൽ പ്രാബല്യത്തിലുള്ള ഭാഗിക കർഫ്യൂവിൽ ഇളവിന്​ അർഹതയുള്ളവർക്കായി ആഭ്യന്തര മന്ത്രാല യം ബാർ കോഡ്​ സംവിധാനം ഒരുക്കുന്നു.
വ്യാഴാഴ്​ച മുതലാണ്​ ഇതു പ്രാബല്യത്തിലാവുക. അവശ്യസേവന രംഗത്ത്​ ജോലി ചെയ്യുന്നവർക്ക്​ മാത്രമാണ്​ കർഫ്യൂവിൽ ഇളവ്​​. ​ഇവർക്ക്​ നേരത്തേ പ്രത്യേക തിരിച്ചറിയൽ കാർഡ്​ നൽകിയിരുന്നു. ഇൗ കാർഡുകൾക്ക്​ ബുധനാഴ്​ച വരെ മാത്രമേ സാധുതയുണ്ടാവൂ.

കാർഡ്​ ദുരുപയോഗം സംബന്ധിച്ച്​ പരാതി ലഭിച്ചതിനെ തുടർന്നാണ്​ ബാർകോഡ്​ സംവിധാനം ഏർപ്പെടുത്താൻ തീരുമാനിച്ചത്​. മൊബൈൽ ഫോണിലേക്കാണ്​ ബാർ കോഡ്​ അയച്ചുനൽകുക. ഇതു​ പരിശോധിക്കുന്ന ഉദ്യോഗസ്ഥർക്ക്​ ഇളവ്​ അനുവദിച്ചിട്ടുള്ള സമയവും റൂട്ടും ഉൾപ്പെടെ വിവരങ്ങൾ അറിയാൻ കഴിയും. മാർച്ച്​ 21 മുതലാണ്​ രാജ്യത്ത്​ വൈകീട്ട്​ അഞ്ചുമുതൽ പുലർച്ച നാലുവരെ കർഫ്യൂ പ്രഖ്യാപിച്ചത്​. നിരോധനാജ്ഞ ലംഘിക്കുന്നവർക്ക്​ മൂന്നുവർഷം വരെ തടവും 10,000 ദീനാർ വരെ പിഴയും ലഭിക്കുമെന്നാണ്​ ആഭ്യന്തര മന്ത്രി അനസ്​ അൽ സാലിഹ്​ അറിയിച്ചിട്ടുള്ളത്​.