ആറു രാജ്യക്കാരുടെ വിസാവിലക്ക്​ പുതുക്കി

കുവൈത്ത്​ സിറ്റി: ആറു രാജ്യക്കാർക്ക്​ കുവൈത്ത്​ ഏർപ്പെടുത്തിയ വിസാവിലക്ക്​ തുടരാൻ തീരുമാനിച്ചു. പാകിസ്​താൻ, ബംഗ്ലാദേശ്​, സിറിയ, യമൻ, ഇറാഖ്​, ഇറാൻ എന്നീ രാജ്യക്കാർക്കാണ്​ നി​യന്ത്രണം ബാധകമാവുക. സന്ദർശക വിസക്കും തൊഴിൽവിസക്കും നിയന്ത്രണം ബാധകമാണ്​. സുരക്ഷകാരണങ്ങൾ മുൻനിർത്തിയാണ്​ ഇൗ രാജ്യങ്ങൾക്ക്​ നിയന്ത്രണം ഏർപ്പെടുത്തിയിട്ടുള്ളത്. ഇൗ ആറു രാജ്യക്കാർക്ക്​ വിസ ലഭിക്കണമെങ്കിൽ ആഭ്യന്തര മ​ന്ത്രിയുടെ പ്രത്യേകാനുമതി വേണം.

ഇതുസംബന്ധിച്ച്​ ആഭ്യന്തര മന്ത്രാലയം എല്ലാ ഗവർ​ണറേറ്റിലേയും താമസകാര്യ ഒാഫിസുകൾക്ക്​ സർക്കുലർ അയച്ചു. ഈ രാജ്യങ്ങളിൽ നിലനിൽക്കുന്ന രാഷ്​ട്രീയ അസ്ഥിരതയാണ് നിയന്ത്രണത്തിന് കാരണമെന്നും സുരക്ഷാസാഹചര്യം മെച്ചപ്പെടുമ്പോൾ നിയന്ത്രണം പിൻവലിക്കുമെന്നുമാണ്​ കുവൈത്ത് നിലപാട്​. നേരത്തെയുള്ളവർക്ക്​ വിസ പുതുക്കുന്നതിന്​ തടസ്സമില്ല. വിസാവിലക്ക്​ നീക്കുന്നത്​ സംബന്ധിച്ച്​ കുവൈത്തും പാകിസ്ഥാനും കഴിഞ്ഞ വർഷം ചർച്ച പുനരാരംഭിച്ചിരുന്നുവെങ്കിലും നടപടികൾ എങ്ങുമെത്തിയിട്ടില്ല.