20 വർഷത്തിനിടയിൽ സ്വദേശികൾക്ക് ആവശ്യമായിവരുക രണ്ടര ലക്ഷം തസ്​തികകൾ

കുവൈത്ത് സിറ്റി: അടുത്ത 20 വർഷത്തിനിടയിൽ കുവൈത്തിലെ ജനസഖ്യയിൽ ഗണ്യമായ വർധനയുണ്ടാകുമെന്നും അതിനനുസരിച്ച് സ്വദേശികൾക്ക് രണ്ടര ലക്ഷം തൊഴിൽ തസ്​തികകൾ വേണ്ടിവരുമെന്നും അധികൃതർ. മോഡിസ്​ എന്ന ഏജൻസി നടത്തിയ പഠന റിപ്പോർട്ടിലാണ് ഇക്കാര്യം സൂചിപ്പിക്കപ്പെട്ടത്.
സ്വദേശികൾക്കിടയിലെ തൊഴിലില്ലായ്മയായിരിക്കും രാജ്യത്തിന് ഭാവിയിൽ മറികടക്കേണ്ട സാമൂഹികവും സാമ്പത്തികവുമായ വൻ വെല്ലുവിളി. മൊത്തം താമസക്കാരിൽ സ്വദേശികളുടെ തോത്​ 31 ശതമാനത്തിലാണ് ഇപ്പോൾ എത്തിനിൽക്കുന്നത്. ഖത്തറിൽ സ്വദേശികളുടെ എണ്ണം 12 ശതമാനവും യു.എ.ഇയിൽ 11 ശതമാനവും മാത്രം വർധിച്ചുകൊണ്ടിരിക്കുമ്പോഴാണിത്.

നിലവിൽ സ്വദേശികൾക്കിടയിലെ തൊഴിലില്ലായ്മയുടെ തോത് 6.4 ശതമാനമാണ്. ജനസംഖ്യാ ക്രമീകരണ നടപടികളുടെ ഭാഗമായി സർക്കാർ-സ്വകാര്യ മേഖലകളിൽ സ്വദേശിവത്​കരണം ശക്തമാക്കിയ സന്ദർഭത്തിലാണ് ഇത്രയും പേർ തൊഴിൽരഹിതരായി തുടരുന്നത്. കാര്യങ്ങൾ ഈ രീതിയിൽ പോവുകയാണെങ്കിൽ അടുത്ത വർഷമാവുമ്പോഴേക്ക് തൊഴിലില്ലായ്മ ഒമ്പതു ശതമാനമായി ഉയരും.
അതേസമയം, ദ്വീപുകളുടെ വികസനമുൾപ്പെടെ വൻകിട വികസന പദ്ധതികൾ യാഥാർഥ്യമാകുന്നതോടെ രണ്ടുലക്ഷം പുതിയ തസ്​തികകൾ ഉണ്ടാകുമെന്ന പ്രതീക്ഷയാണുളളത്. അങ്ങനെയാണെങ്കിൽ അത്തരം തൊഴിലവസരങ്ങൾ ഉപയോഗപ്പെടുത്തി തൊഴിലില്ലായ്മ മറികടക്കാൻ മുൻകൂട്ടി പദ്ധതികൾ തയാറാക്കണം. അതോടൊപ്പം, സർക്കാർ-സ്വകാര്യ മേഖലകളിൽനിന്ന് വിദേശികളെ പരമാവധി ഒഴിവാക്കിക്കൊണ്ടായിരിക്കും സാഹചര്യം മറികടക്കുകയെന്നും റിപ്പോർട്ടിൽ പറയുന്നുണ്ട്.