സ്​ത്രീകളുടെ വിരമിക്കൽപ്രായം 45, പുരുഷന്മാരുടേത് 50

കുവൈത്ത്​ സിറ്റി: രാജ്യത്ത്​ സർക്കാർ മേഖലകളിൽ ജോലി ചെയ്യുന്നവരുടെ വിരമിക്കൽ പ്രായം കുറക്കാനുള്ള കരട് നിർദേശത്തിന് പാർലമ​െൻറിലെ ധനകാര്യ സമിതിയുടെ അംഗീകാരം. യോഗ നടപടികൾക്ക് ശേഷം നടത്തിയ പ്രസ്​താവനയിൽ സമിതി അംഗം എം.പി സാലിഹ് ആശൂർ ആണ് ഇക്കാര്യം അറിയിച്ചത്. 
സ്​ത്രീകളുടെ വിരമിക്കൽ പ്രായം 45ഉം പുരുഷന്മാരുടേത് 50 ആയും കുറക്കണമെന്നാവശ്യപ്പെട്ട് സമർപ്പിച്ച പ്രമേയത്തിനാണ് അംഗീകാരം നൽകിയത്. ഇതനുസരിച്ച് സ്​ത്രീ ജീവനക്കാർക്ക് സർക്കാർ സർവിസുകളിൽ 20  വർഷവും പുരുഷ ഉദ്യോഗസ്​ഥർക്ക് 25 വർഷവും തുടർന്നാൽ മതിയാകും. 45 വയസ്സ് കഴിഞ്ഞ സ്​ത്രീ ജീവനക്കാരും 50 കഴിഞ്ഞ പുരുഷന്മാരും നിർബന്ധമായും വിരമിക്കണമെന്ന നിയമമാണ് ഉണ്ടാവുക.

റിപ്പോർട്ട് അംഗീകാരത്തിനായി പാർലമ​െൻറിന് മുന്നിൽവെക്കുമെന്ന് സാലിഹ് ആശൂർ പറഞ്ഞു. തൊഴിൽരഹിതരായ സ്വദേശി ചെറുപ്പക്കാർക്ക് അവസരം ഒരുക്കുന്നതി​െൻറ ഭാഗമായാണ് സർവിസിലുള്ളവരുടെ പെൻഷൻ പ്രായം കുറക്കണമെന്ന ആവശ്യം ഉണ്ടായത്. 20000ത്തിന് മുകളിൽ സ്വദേശികളാണ് സർക്കാർ മേഖലകളിൽ ജോലി ലഭിക്കാൻ സിവിൽ സർവിസ്​ കമീഷനിൽ അപേക്ഷ കൊടുത്ത്​ കാത്തിരിക്കുന്നത്. വിദേശികളെ ഒഴിവാക്കി സ്വദേശികൾക്ക് നിയമനം നൽകുന്ന വിവിധ പദ്ധതികളും ഇതി​െൻറ ഭാഗമായി നടക്കുന്നുണ്ട്.