ബസുമില്ല, ടാക്​സിയുമില്ല; കുവൈത്തിൽ യാത്ര കഷ്​ടത്തിൽ

കുവൈത്ത്​ സിറ്റി: ഘട്ടംഘട്ടമായി കോവിഡ്​ പ്രതിരോധ നടപടികൾ ശക്തിപ്പെടുത്തിവരുന്ന കുവൈത്ത്​ ലോക്ഡൗണിന്​ സമാനമായ സാഹചര്യത്തിലേക്ക്​ നീങ്ങാൻ സാധ്യത. വ്യാഴാഴ്​ച വൈകുന്നേരം ടാക്​സി സർവിസ്​ അവസാനിപ്പിച്ചതാണ്​ അവസാന പ്രധാന നടപടി. പല സ്വകാര്യ കമ്പനികളും പ്രവർത്തിക്കുന്നതുമൂലം പകൽ നിരത്തുകൾ സജീവമാണ്​.

ഇത്​ ആരോഗ്യ മന്ത്രാലയം ലക്ഷ്യം വെക്കുന്ന സാമൂഹിക അകലം പാലിക്കലിന്​ വിരുദ്ധമായതിനാലാണ്​ സർക്കാർ നടപടികൾ കടുപ്പിക്കാൻ തീരുമാനിച്ചത്​. ബസ്​ സർവിസുകൾക്ക്​​ പുറമെ ടാക്​സികൂടി നിർത്തിയതോടെ സാമൂഹിക ജീവിതവും സഞ്ചാരവും പരിമിതമാവും. അതിനിടെ, ടാക്​സി സർവിസ്​ നിലച്ചതോടെ മിക്കവാറും കമ്പനികൾ സ്വന്തം ഗതാഗത സൗകര്യം ഏർപ്പെടുത്തിയിട്ടുണ്ട്​. വരും ദിവസങ്ങളിൽ സ്വകാര്യവാഹനങ്ങളി​ലെ സഞ്ചാരവും അവശ്യകാര്യങ്ങൾക്ക്​ മാത്രമാക്കുമെന്ന സൂചനകൾ രാഷ്​ട്രീയ നിരീക്ഷകർ പങ്കുവെക്കുന്നുണ്ട്​.

വൈകീട്ട്​ അഞ്ചുമുതൽ പുലർച്ച നാലുവരെ കർഫ്യൂ ​നീട്ടാനുള്ള സാധ്യതയും തള്ളാനാവില്ല. നേരത്തേ വീട്ടിലിരിക്കാനുള്ള നിർദേശം ഒരുവിഭാഗം ജനങ്ങൾ അനുസരിക്കാത്തതിനാലാണ്​ ഭാഗിക കർഫ്യൂ ഏർപ്പെടുത്തിയത്​. ഗൾഫ്​ രാജ്യങ്ങളിൽ തന്നെ കോവിഡ്​ പ്രതിരോധ നടപടികൾ നേര​േത്ത തുടങ്ങിവെച്ചതും ശക്തമായി നടപ്പാക്കുന്നതും കുവൈത്ത്​ ആണ്​.

അതുവഴി വൈറസി​​െൻറ സാമൂഹിക വ്യാപനം തടയാൻ രാജ്യത്തിന്​ കഴിഞ്ഞിട്ടുമുണ്ട്​. ഭക്ഷ്യവസ്​തുക്കൾ ഉൾപ്പെടെ അടിസ്ഥാനാവശ്യങ്ങൾക്കുള്ള കടകൾക്ക്​ മാത്രമാണ്​ തുറക്കാൻ അനുമതി​. സാമൂഹിക വ്യാപനത്തി​​െൻറ സാധ്യത അനുഭവപ്പെട്ടാൽ കുവൈത്ത് പൂർണ​ ലോക്ഡൗണിലേക്ക്​ നീങ്ങുമെന്നാണ്​ ഉന്നതവൃത്തങ്ങൾ നൽകുന്ന സൂചന.