10 വിവാഹ സല്‍ക്കാരങ്ങള്‍ റദ്ദാക്കി

കുവൈത്ത് സിറ്റി: അഹ്​മദി ഗവര്‍ണറേറ്റ് കേന്ദ്രീകരിച്ച്​ മുനിസിപ്പാലിറ്റി നടത്തിയ പരിശോധനയില്‍ 67 കടകള്‍ അടച്ചുപൂട്ടി. 10 വിവാഹ സല്‍ക്കാരങ്ങള്‍ റദ്ദാക്കി. അഹ്​മദി ഗവര്‍ണറേറ്റ് മുനിസിപ്പാലിറ്റി മേധാവി സഊദ് അല്‍ ദബൂസാണ് ഇക്കാര്യം അറിയിച്ചത്. ആരോഗ്യമന്ത്രാലയവും മന്ത്രിസഭയും മുന്നോട്ടുവെക്കുന്ന മാർഗനിർദേശങ്ങള്‍ ലംഘിച്ചവര്‍ക്കെതിരെയാണ് നടപടിയെടുത്തത്.

ഈ ഭാഗത്തെ 300 കടകള്‍ക്ക് താക്കീത് നല്‍കുകയും 63 എണ്ണത്തിന്​ പിഴകള്‍ ചുമത്തുകയും ചെയ്​തു. 31 പേർക്ക്​ പിഴ ചുമത്തിയത് തെരുവുകച്ചവടം നടത്തിയതിനാണ്. പ്രദേശത്തെ അഞ്ച് റസ്​റ്റാറൻറുകളും അഞ്ച് സലൂണുകളും നാല് വനിത സലൂണുകളും അടച്ചുപൂട്ടി. 106,367 കണ്ടെയ്​നറുകള്‍ അണുമുക്തമാക്കിയതായും 17 ഉപേക്ഷിക്കപ്പെട്ട കാറുകള്‍ കണ്ടുകെട്ടിയതായും അദ്ദേഹം വ്യക്തമാക്കി. തമ്പുകാലം കഴിഞ്ഞിട്ടും പൊളിക്കാത്ത 71 തമ്പുകള്‍ മുനിസിപ്പാലിറ്റി നീക്കിയെന്നും അദ്ദേഹം അറിയിച്ചു.