82കാരി വൈറസ്​ മുക്​തയായി; ആരോഗ്യ മന്ത്രാലയത്തിന്​ അഭിമാനം

കുവൈത്ത് സിറ്റി: കോവിഡ്-19 ബാധിച്ച് ചികിത്സയിലായിരുന്ന 82 വയസ്സുള്ള സ്വദേശി വനിത രോഗമുക്തയായെന്ന്​ ആരോഗ്യമന്ത്രി ഡോ. ശൈഖ് ബാസിൽ അസ്സബാഹ് വ്യക്തമാക്കി. കുവൈത്ത്​ ആരോഗ്യ മന്ത്രാലയത്തിനു കീഴിൽ മികച്ച ചികിത്സയും പരിചരണവുമാണ്​ കോവിഡ്​ ബാധിതർക്ക്​ നൽകുന്നത്​. ഇതുവരെ രാജ്യത്ത്​ 73 പേരാണ് രോഗമുക്തി നേടിയത്. 13 പേർ മാത്രമാണ്​ തീവ്രപരിചരണ വിഭാഗത്തിലുള്ളത്​. ഇതിൽ പത്തുപേർക്ക്​ ഗുരുതരാവസ്ഥയില്ല. ബാക്കി മൂന്നുപേർ പ്രായമായവരോ നേര​േത്തയുള്ള മറ്റ്​ അസുഖങ്ങൾ കാരണം പ്രയാസപ്പെടുന്നവരോ ആണ്​. 82കാരി കൊറോണ വൈറസിൽനിന്ന് സുഖം പ്രാപിച്ചുവെന്ന് ലബോറട്ടറി, റേഡിയോളജി പരിശോധനകളിൽ വ്യക്തമായെന്നും രണ്ട് ദിവസത്തിനുള്ളിൽ ഇവരെ വീട്ടിലയക്കുമെന്നും മന്ത്രി അറിയിച്ചു. കുവൈത്തിൽ കോവിഡ്​ ബാധിച്ച്​ ഇതുവരെ ആരും മരിച്ചിട്ടില്ല.