കെ.എം.സി.സി ഇടപെടൽ; വേദനക്കിടയിലും മുഹമ്മദ് നിസാറിന്​ സന്തോഷപ്പെരുന്നാൾ

കുവൈത്ത് സിറ്റി: കുവൈത്തിൽ കാറപകടത്തിൽ പരിക്കേറ്റ്​ ചികിത്സയിലായിരുന്ന താനൂർ പെരിഞ്ചേരി സ്വദേശി മുഹമ്മദ് നിസാർ നാട്ടിലെത്തി.
 ഈ മാസം തുടക്കത്തിൽ കാണാതാവുകയും തുടർന്ന് കെ.എം.സി.സി മെഡിക്കൽ വിങ്​ വഴി നടത്തിയ അന്വേഷണത്തിൽ തലക്ക്​ ഗുരുതര പരിക്കേറ്റ് അദാൻ ആശുപത്രിയിൽ ചികിത്സയിലാണെന്ന് കണ്ടെത്തുകയുമായിരുന്നു. മേയ്​ 11ന്​ ആശുപത്രിയിൽനിന്ന്​ ഡിസ്ചാർജ് ചെയ്തെങ്കിലും സ്വദേശിയായ സ്പോൺസർ മറ്റൊരു സ്ഥലത്ത് താമസമൊരുക്കുകയുമായിരുന്നു. 25ന്​ തുടർചികിത്സ നിർദേശിക്കപ്പെട്ടിരുന്നതിനാലും ഇപ്പോഴത്തെ സാഹചര്യത്തിൽ കുവൈത്തിൽ അത് പ്രയാസമായതിനാലും നാട്ടിലേക്ക് പോകാൻ വഴി തേടുകയായിരുന്നു.

എംബസിയിൽ രജിസ്​റ്റർ ചെയ്​തെങ്കിലും മേയ്​ 19ന്​ കണ്ണൂരിലേക്കുള്ള യാത്രക്കാരുടെ പട്ടികയിൽ ഉൾപ്പെട്ടിരുന്നില്ല. പിന്നീട്​ കെ.എം.സി.സി പ്രസിഡൻറ്​ ഷറഫുദ്ദീൻ കണ്ണേത്തി​​​െൻറ ഇടപെടലിൽ നിസാറി​​​െൻറ അവസ്ഥ എംബസി ഉദ്യോഗസ്ഥർക്ക്​​ ബോധ്യപ്പെടുകയും യാത്രക്ക്​ അവസരമൊരുക്കുകയുമായിരുന്നു. വിമാനം കണ്ണൂരിലിറങ്ങിയെങ്കിലും നിസാറിനെ കാത്തുനിന്നവർക്ക് നിരാശയായിരുന്നു ഫലം. തുടർന്ന് നടന്ന അന്വേഷണത്തിൽ സ്വബോധം നഷ്​ടപ്പെട്ട്​ മറ്റൊരു ലോഞ്ചിൽ കണ്ടെത്തുകയും ശേഷം കോട്ടക്കൽ ക്വാറൻറീൻ സ​​െൻററിലെത്തിക്കുകയും പിന്നീട് അവിടെനിന്ന് മഞ്ചേരി മെഡിക്കൽ കോളജിൽ അഡ്മിറ്റ് ചെയ്യുകയുമാണുണ്ടായത്. വേദനക്കിടയിലും നാട്ടിലെത്താൻ കഴിഞ്ഞതി​​​െൻറ സന്തോഷപ്പെരുന്നാളിലാണ്​ നിസാറും കുടുംബവും.