കല കുവൈത്തി​െൻറ കൊച്ചിയിലേക്കുള്ള രണ്ടാം ചാർട്ടേഡ് വിമാനം 18ന്

കുവൈത്ത്​ സിറ്റി: കോവിഡ് പശ്ചാത്തലത്തിൽ കുവൈത്തിൽ കുടുങ്ങിപ്പോയ പ്രവാസികളെ നാട്ടിലെത്തിക്കാൻ കല കുവൈത്തി​​െൻറ രണ്ടാം ചാർട്ടേഡ് വിമാനം ജൂൺ 18ന് കൊച്ചിയിലേക്ക്‌ യാത്രയാവും. സംസ്ഥാന സർക്കാർ നിഷ്കർഷിച്ച മുൻഗണനാക്രമം പാലിച്ച്​ ആദ്യഘട്ട രജിസ്ട്രേഷനിൽ നിന്നും തെരഞ്ഞെടുത്ത യാത്രികരെയാണ് പരിഗണിക്കുന്നത്.

ഗർഭിണികൾ, ജോലി നഷ്​ടപ്പെട്ടവർ, രോഗികൾ, തുടർപഠനത്തിന് പോകേണ്ട വിദ്യാർഥികൾ എന്നിവരെയാണ് രണ്ടാം ഘട്ടത്തിലും ഉൾപ്പെടുത്തിയിട്ടുള്ളത്. 10 കൈക്കുഞ്ഞുങ്ങളുംൾ ഉൾപ്പെടെ 332 യാത്രക്കാരാണ് ആദ്യ വിമാനത്തിൽ നാട്ടിലേക്ക് പോയത്. കുവൈത്ത്​ എയർവേയ്​സാണ്​ സർവീസ്​ നടത്തുന്നത്​. വന്ദേഭാരത് മിഷ​​െൻറ ഭാഗമായി ഇന്ത്യൻ സർക്കാർ ഏർപ്പെടുത്തിയ വിമാന സർവ്വീസുകളുടെ അപര്യാപ്തത മൂലം നിരവധിയാളുകൾ നാട്ടിലേക്ക് മടങ്ങുവാൻ ബുദ്ധിമുട്ട് അനുഭവിക്കുന്നുണ്ട്.

കൂടുതൽ ചാർട്ടർ വിമാനങ്ങൾക്കായുള്ള ശ്രമങ്ങൾ ഇനിയും തുടരുമെന്ന് കല കുവൈത്ത്​ പ്രസിഡൻറ്​ ജ്യോതിഷ് ചെറിയാൻ, ജനറൽ സെക്രട്ടറി സി.കെ. നൗഷാദ് എന്നിവർ വാർത്താക്കുറിപ്പിൽ അറിയിച്ചു.