കല കുവൈത്ത് മെഗാ സാംസ്കാരിക മേള 'മാനവീയം 2022' 14ന്
text_fieldsകുവൈത്ത് സിറ്റി: കേരള ആർട്ട് ലവേഴ്സ് അസോസിയേഷൻ, കല കുവൈത്തിന്റെ ഈ വർഷത്തെ മെഗാ സാംസ്കാരിക മേള 'മാനവീയം 2022'ന്റെ ഒരുക്കം പൂർത്തിയായതായി കല കുവൈത്ത് ഭാരവാഹികൾ വാർത്തസമ്മേളനത്തിൽ അറിയിച്ചു. ഒക്ടോബർ 14ന് അബ്ബാസിയ ഇന്ത്യൻ സെൻട്രൽ സ്കൂൾ ഓപൺ ഓഡിറ്റോറിയത്തിൽ നടക്കുന്ന സാംസ്കാരിക മേളയിൽ സി.പി.എം കേന്ദ്രകമ്മിറ്റി അംഗവും മുൻ ആരോഗ്യ മന്ത്രിയുമായ കെ.കെ. ശൈലജ മുഖ്യാതിഥിയായി പങ്കെടുക്കും. വൈകീട്ട് നാലുമുതൽ സാംസ്കാരിക സമ്മേളനത്തോടെയാണ് പരിപാടി ആരംഭിക്കുന്നത്. കല കുവൈത്തിന്റെ നേതൃത്വത്തിൽ നടത്തിയ സാഹിത്യ മത്സര വിജയികൾക്കുള്ള സമ്മാനദാനവും പരിപാടിയിൽ നൽകും.
കണ്ണൂർ ഷെരീഫ്, പ്രസീത ചാലക്കുടി, ആഷിമ മനോജ്, അനൂപ് കോവളം എന്നിവർ ഉൾപ്പെടുന്ന ഗായക സംഘം പരിപാടിയിൽ പങ്കെടുക്കും. കുവൈത്തിലെ സാമൂഹിക സാംസ്കാരിക രംഗത്തെ പ്രമുഖരും മാധ്യമ പ്രവർത്തകരും സംബന്ധിക്കും. കോവിഡ് മഹാമാരിക്കുശേഷം രണ്ടുവർഷത്തിനിപ്പുറമാണ് മെഗാ സാംസ്കാരിക മേള നേരിട്ട് നടക്കുന്നത്. കഴിഞ്ഞ രണ്ടുവർഷം മുഖ്യമായും സാമൂഹിക പ്രവർത്തനങ്ങളിൽ കേന്ദ്രീകരിച്ചാണ് കലയുടെ പ്രവർത്തനങ്ങൾ നടന്നത്.
ജോലിയും ശമ്പളവും ലഭിക്കാതെ കഷ്ടതയനുഭവിച്ചവർക്ക് ഭക്ഷണക്കിറ്റുകൾ നൽകിയും രോഗികൾക്ക് മരുന്നെത്തിച്ചും കൈത്താങ്ങാകാൻ കലക്ക് കഴിഞ്ഞതായി ഭാരവാഹികൾ പറഞ്ഞു. ഒമ്പത് ചാർട്ടേഡ് ഫ്ലൈറ്റുകളിലായി 3000ത്തോളം ആളുകളെ നാട്ടിലെത്തിക്കുന്നതിന് കലക്ക് കോവിഡ് കാലത്ത് സാധിച്ചതായും ഭാരവാഹികൾ കൂട്ടിച്ചേർത്തു. പ്രസിഡണ്ട് പി.ബി.സുരേഷ്, ജനറൽ സെക്രട്ടറി ജെ.സജി, ട്രഷറർ അജ്നാസ്, മാനവീയം കമ്മിറ്റി ജനറൽ കൺവീനർ അനൂപ് മങ്ങാട്ട്, മീഡിയ സെക്രട്ടറി ശ്രീജിത്.കെ, കല വൈസ് പ്രസിഡന്റ് ശൈമേഷ്, ജേയിൻ സെക്രട്ടറി ജിതിൻ പ്രകാശ് എന്നിവർ വാർത്താസമ്മേളത്തിൽ പങ്കെടുത്തു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.