വിദേശ മാധ്യമപ്രവര്‍ത്തകര്‍ക്ക് വിപുലമായ  സൗകര്യങ്ങള്‍

കുവൈത്ത് സിറ്റി: തെരഞ്ഞെടുപ്പ് റിപ്പോര്‍ട്ട് ചെയ്യാനത്തെിയ 150 വിദേശമാധ്യമ പ്രവര്‍ത്തകര്‍ക്കായി വിപുലമായ സൗകര്യങ്ങളാണ് ഏര്‍പ്പെടുത്തിയിരുന്നത്. 75 തെരഞ്ഞെടുപ്പ് നിരീക്ഷകരുള്‍പ്പെടെ 150ഓളം വിദേശ മാധ്യമപ്രവര്‍ത്തകര്‍ക്കാണ് പ്രത്യേകാനുമതി നല്‍കുകയും സൗകര്യങ്ങള്‍ ഏര്‍പ്പെടുത്തുകയും ചെയ്തത്. സി.എന്‍.എന്‍, അല്‍ അറബിയ, സ്കൈ ന്യൂസ് തുടങ്ങിയ പ്രമുഖ മാധ്യമങ്ങള്‍ക്കൊപ്പം ഇന്ത്യയില്‍നിന്ന് ഏക ചാനലായി മീഡിയവണ്‍ ആണുള്ളത്. ഷെറാട്ടണിലെ മീഡിയ സെന്‍ററിന് കീഴിലാണ് വിദേശ മാധ്യമപ്രവര്‍ത്തകര്‍ക്ക് സൗകര്യങ്ങള്‍ ഏര്‍പ്പെടുത്തിയത്. ദ്വിഭാഷികളുടെ സഹായവും കുവൈത്ത് ന്യൂസ് ഏജന്‍സി, കുവൈത്ത് ടി.വി, റേഡിയോ എന്നിവയുടെ സഹകരണവും ലഭ്യമാക്കിയിരുന്നു. വിദേശ മാധ്യമപ്രവര്‍ത്തകര്‍ക്ക് പോളിങ് സെന്‍ററുകളിലും മറ്റും പ്രവേശനാനുമതി നല്‍കിയതിന് പുറമെ പാര്‍ലമെന്‍റും മറ്റും സന്ദര്‍ശിക്കാനും സൗകര്യമേര്‍പ്പെടുത്തിയിട്ടുണ്ട്.