കുവൈത്തിൽ ഇന്ത്യൻ സമൂഹം ജാഗ്രത ശക്​തമാക്കേണ്ട ഘട്ടം

കുവൈത്ത്​ സിറ്റി: കോവിഡ്​ പ്രതിരോധവുമായി ബന്ധപ്പെട്ട്​ കുവൈത്തിൽ ഇന്ത്യൻ സമൂഹം ജാഗ്രത ശക്​തമാക്കേണ്ട ഘട് ടം. ഇന്ത്യക്കാർ തിങ്ങിത്താമസിക്കുന്ന ജലീബ്​ അൽ ശുയൂഖ്​, മഹ്ബൂല, സാൽമിയ എന്നിവിടങ്ങളിലാണ്​ കഴിഞ്ഞ ദിവസങ്ങളിൽ വൈറസ്​ റിപ്പോർട്ട്​ ചെയ്യപ്പെട്ടത്​. രണ്ട്​ ദിവസം കൊണ്ട്​ വൈറസ്​ ബാധിതരായ ഇന്ത്യക്കാരുടെ എണ്ണത്തിൽ കുതിപ്പുണ്ടായി.

ഞായറാഴ്​ച ഒമ്പത്​ പേർക്കും തിങ്കളാഴ്​ച എട്ടുപേർക്കുമാണ്​ വൈറസ്​ സ്ഥിരീകരിച്ചത്​. ഇതോടെ മൊത്തം ഇന്ത്യക്കാരുടെ എണ്ണം 25 ആയി. മൂന്ന്​ പേർക്ക്​ രോഗം ബാധിച്ചത്​ ഏതുവഴിക്കാണ്​ എന്നത്​ കണ്ടെത്താൻ കഴിഞ്ഞിട്ടില്ല. ഇവർ താമസിക്കുന്ന ഭാഗങ്ങളും പോയ വഴികളും അധികൃതർ നിരീക്ഷണ വലയത്തിലാക്കിയിട്ടുണ്ട്​.

ഇന്ത്യക്കാർക്കിടയിലെ വ്യാപനമാണ്​ കുവൈത്ത്​ അധികൃതരും ഏറെ ഭയക്കുന്നത്​. രാജ്യത്തെ ഏറ്റവും വലിയ വിദേശി സമൂഹമാണ്​ ഇന്ത്യക്കാർ. വൈറസ്​ ബാധയിലും സ്വദേശികൾ കഴിഞ്ഞാൽ മുന്നിലുള്ളത്​ ഇന്ത്യക്കാരാണ്​. 14 ലക്ഷം വരുന്ന സ്വദേശികളെ കഴിഞ്ഞാൽ പത്തുലക്ഷം ഇന്ത്യക്കാരാണ്​ ജനസംഖ്യയിൽ മുന്നിൽ. മാത്രമല്ല, പ്ര​​ത്യേക കേന്ദ്രങ്ങളിൽ ഫ്ലാറ്റുകളിൽ തിങ്ങിത്താമസിക്കുന്നവരാണവരിൽ ഭൂരിഭാഗവും.

സർക്കാർ മാർഗനിർദേശം ലംഘിച്ച്​ പുറത്തിറങ്ങി നടക്കുന്നതിൽ ഇന്ത്യക്കാർ ഒട്ടും പിന്നിലല്ല. ആരും ഭയക്കേണ്ടെന്നും ദയവായി വീട്ടിലിരിക്കൂ എന്നുമുള്ള നിർദേശം മാനിക്കാതെ കൂട്ടം ചേർന്ന്​ നടക്കുകയാണ്​ പലരും. മാർക്കറ്റിലും നിരത്തുകളിലും കർഫ്യൂ അല്ലാത്ത സമയങ്ങളിൽ തിരക്ക്​ അനുഭവപ്പെടുന്നുണ്ട്​​.