വീട്ടുജോലിക്കാരുടെ തിരിച്ചുവരവ്​: നടപടികളാരംഭിക്കാൻ ആവ​ശ്യപ്പെട്ട്​ മന്ത്രിസഭ

കുവൈത്ത്​ സിറ്റി: അവധിക്ക്​ നാട്ടിൽ പോയ ഗാർഹികത്തൊഴിലാളികളെ മടക്കിക്കൊണ്ടുവരുന്നതുമായി ബന്ധപ്പെട്ട നടപടികൾ ആരംഭിക്കാൻ കുവൈത്ത്​ മന്ത്രിസഭ ബന്ധപ്പെട്ട വകുപ്പുകൾക്ക്​ നിർദേശം നൽകി. രണ്ടാഴ്​ചത്തെ ഇൻസ്​റ്റിറ്റ്യൂഷനൽ ക്വാറൻറീൻ ഇരിക്കണമെന്ന വ്യവസ്ഥയോടെയാണ്​ മടങ്ങിവരവിന്​ അംഗീകാരം നൽകിയത്​. ഇതിനായി സ്​പോൺസർമാർ ഒാൺലൈനിൽ അപേക്ഷിക്കണം. ടിക്കറ്റിനും ക്വാറൻറീനുമുള്ള ചെലവ്​ സ്​പോൺസർ വഹിക്കണം. എന്നാൽ, കോവിഡ്​ പരിശോധന സർക്കാർ ചെലവിൽ നടത്തും. 15 ദിവസത്തെ ക്വാറൻറീനാണ്​ ഇപ്പോൾ നിഷ്​കർഷിക്കുന്നത്​. ആരോഗ്യ മന്ത്രാലയം, വ്യോമയാന വകുപ്പ്​, ആഭ്യന്തര മന്ത്രാലയം, മാൻപവർ അതോറിറ്റി എന്നിവ ചേർന്നാണ്​ തൊഴിലാളികളുടെ മടങ്ങിവരവിന്​ പദ്ധതി തയാറാക്കുക. ഇന്ത്യയുൾപ്പെടെ 34 രാജ്യങ്ങളിൽനിന്നുള്ള ഗാർഹികേതര തൊഴിലാളികളുടെ മടങ്ങിവരവിന്​ ഇനിയും കാത്തിരിക്കേണ്ടിവരുമെന്ന സൂചനയാണ്​ ഇപ്പോൾ ലഭിക്കുന്നത്​. ഒാൺലൈനായി നടത്തിയ മന്ത്രിസഭ യോഗത്തിൽ പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹ്​ അധ്യക്ഷത വഹിച്ചു.