അടിയന്തര ഇടപെടൽ; അഞ്ചുവയസ്സുകാരിയെ സൈനിക വിമാനത്തിൽ ഇന്ത്യയിലെത്തിച്ചു

കുവൈത്ത്​ സിറ്റി: അടിയന്തര ഇടപെടലിനെ തുടർന്ന്​ അഞ്ചുവയസ്സുകാരിയായ മലയാളി പെൺ​കുട്ടിയെ സൈനിക വിമാനത്തിൽ കുവ ൈത്തിൽനിന്ന്​ ഇന്ത്യയിലെത്തിച്ചു. ചെവിയിൽനിന്ന്​ രക്​തസ്രാവമുള്ള പാലക്കാട്ടുകാരിയായ സാധിക രതീഷ്​ കുമാർ ആണ് ​ പിതാവിനൊപ്പം ഡൽഹിയിലേക്ക്​ വിമാനം കയറിയത്​.

ഇന്ത്യയിൽനിന്ന്​ കുവൈത്തിലെത്തിയ പ്രത്യേക മെഡിക്കൽ സംഘം തിരിച്ചുപോവുന്ന സൈനിക വിമാനത്തിലാണ്​ സാധികയെ കൊണ്ടുപോയത്​.

കുവൈത്തിലെ കെ.സി.സി ആശുപത്രിയിൽ ചികിത്സയിലായിരുന്ന സാധികക്ക്​ അടിയന്തര ശസ്​ത്രക്രിയ ആവശ്യമായിരുന്നു. കുവൈത്തിൽ ഇതിനുള്ള സൗകര്യം ഇല്ലാത്തതിനാൽ ഇന്ത്യൻ അംബാസഡർ കെ. ജീവസാഗർ, സെക്കൻഡ്​ സെക്രട്ടറിമാരായ ഫഹദ്​, യു.എസ്​. സിബി എന്നിവരുടെ ഇടപെടലിനെ തുടർന്ന്​ പ്രതിരോധ മന്ത്രാലയം, വിദേശകാര്യ മന്ത്രാലയം, ആരോഗ്യ മന്ത്രാലയം, വ്യോമയാന വകുപ്പ്​ എന്നിവ ഏകോപിപ്പിച്ച്​ അടിയന്തര രക്ഷാ ദൗത്യത്തിന്​ പദ്ധതി ഒരുക്കുകയായിരുന്നു.

കോവിഡ്​ പ്രതിസന്ധി ആരംഭിച്ച ശേഷം ഗൾഫിൽനിന്നുള്ള ഇന്ത്യയുടെ ആദ്യ രക്ഷാപ്രവർത്തനമാണിത്​. നാട്ടിൽ സർക്കാർ തലത്തിൽ വിദേശകാര്യ സഹമന്ത്രി വി. മുരളീധരൻ, സുരേഷ്​ ഗോപി എം.പി എന്നിവർ ഇടപെടൽ നടത്തിയതായാണ്​ വിവരം. ഡൽഹി എയിംസ്​ ആശുപത്രിയിൽ എത്തിച്ച കുട്ടിയെ വൈകാതെ സങ്കീർണ ശസ്​ത്രക്രിയക്ക്​ വിധേയമാക്കും.