സൗഹൃദ ഫുട്​ബാൾ: കാമറൂണിനോടും അടിപതറി കുവൈത്ത്​ (3-1)

കുവൈത്ത്​ സിറ്റി: കാമറൂണിനെതിരായ സൗഹൃദ ഫുട്​ബാൾ മത്സരത്തിൽ കുവൈത്തിന്​ ഒന്നിനെതിരെ മൂന്നുഗോളി​​​െൻറ ​തോൽവി. കുവൈത്തിലെ ജാബിർ സ്​റ്റേഡിയത്തി​ൽ നടന്ന മത്സരത്തിൽ ആഫ്രിക്കൻ കരുത്തർ ആതിഥേയരെ നിഷ്​പ്രഭരാക്കി. കാമറൂണിനായി ബാസ്സോഗോഗ്​ ഇരട്ടഗോൾ നേടിയപ്പോൾ അബൂബക്കർ ഒരുഗോൾ നേടി. യഅ്​ഖൂബ്​ അൽ തരാർവയിലൂടെയായിരുന്നു കുവൈത്തി​​​െൻറ മറുപടി. ആദ്യപകുതിയിൽ സന്ദർശകർ ഏകപക്ഷീയമായ രണ്ടുഗോളിന്​ മുന്നിലായിരുന്നു. 11ാം മിനിറ്റിൽ അബൂബക്കറിലൂടെ കാമറൂൺ ആദ്യഗോൾ നേടി. അതി​​​െൻറ ഞെട്ടലിൽനിന്ന്​ മാറി മത്സരത്തിലേക്ക്​ തിരിച്ചുവരാൻ  ശ്രമിക്കുന്നതിനിടെ വീണ്ടും കുവൈത്തി​​​െൻറ വലയനങ്ങി. 17ാം മിനിറ്റിൽ ബസ്സോഗോഗ്​ ആണ്​ ആഫ്രിക്കൻ പടയുടെ ലീഡുയർത്തിയത്​.

57ാം ബാസ്സോഗോഗ്​ ത​​​െൻറ രണ്ടാം ഗോൾ നേടിയതോടെ കാമറൂൺ മൂന്ന്​​ ഗോളിന്​ മുന്നിൽ. എന്നാൽ, മൂന്നുമിനിറ്റിനകം കുവൈത്ത്​ മറുപടി നൽകി. യഅ്​ഖൂബ്​ അൽ തരാർവയാണ്​ കുവൈത്തിനായി ആശ്വാസഗോൾ നേടിയത്​. മൂന്നുഗോൾ ലീഡ്​ നേടിയതോടെ പ്രതിരോധം കനപ്പിച്ച കാമറൂണിനെതിരെ കുവൈത്തിന്​ വെല്ലുവിളി ഉയർത്താനായില്ല. സ്​കോർ സൂചിപ്പിക്കുംപോലെ കാമറൂണിനു​തന്നെയായിരുന്നു ആധിപത്യം. 31ാം മിനിറ്റിൽ ബോക്​സിനുള്ളിൽ വെച്ച്​ കാമറൂൺ ​താരം ഒൻഡോ തൊടുത്ത ഷോട്ട്​ കുവൈത്ത്​ ഗോളി കുത്തിയകറ്റി. കുവൈത്തിന്​ ഇടക്കുലഭിച്ച ഒറ്റപ്പെട്ട അവസരങ്ങളും ദുർബലമായ ഷോട്ടുകളും കാമറൂൺ ഗോളി അനായാസം നിഷ്​ഫലമാക്കി. 

രണ്ടു​വർഷത്തെ കായിക വിലക്കിനു​ശേഷം കളത്തിലേക്ക്​ തിരിച്ചെത്തിയ കുവൈത്തിന്​ ഇതുവരെ ഒരു ജയം സ്വന്തമാക്കാനായില്ല. കഴിഞ്ഞയാഴ്​ച ജോർഡനെതിരെ നടന്ന സൗഹൃദ മത്സരത്തിൽ കുവൈത്ത്​ ഒരുഗോളിന്​ പരാജയപ്പെട്ടിരുന്നു. ഗൾഫ്​ കപ്പ്​ ടൂർണമ​​െൻറിൽ ആദ്യറൗണ്ടിൽ തന്നെ പുറത്താവാനായിരുന്നു കുവൈത്തി​​​െൻറ വിധി. വിരമിക്കുന്ന മുൻ ദേശീയ ടീം ഗോൾകീപ്പർ അഹ്​മദ്​ ജാസിമിനെ​ മത്സരത്തിനുമുമ്പ്​ ആദരിച്ചു. കായികമന്ത്രി ഖാലിദ്​ അൽ റൗദാൻ അഹ്​മദ്​ ജാസിമിന്​ ഉപഹാരം നൽകി.