കുവൈത്തിൽ പുറംവേദനയെ കൊറോണയാക്കി പ്രചാരണം

കുവൈത്ത്​ സിറ്റി: റോഡരികിൽ കിടക്കുന്നയാൾ കൊറോണ വൈറസ്​ ബാധിച്ച്​ വീണുപോയതാണെന്ന്​ വ്യാജ പ്രചാരണം. ഫർവാനിയയിൽ കടുത്ത പുറംവേദന കാരണം റോഡരികിലെ നടപ്പാതയിൽ കിടന്നയാളുടെ ദൃശ്യമാണ്​ വൈറസ്​ ബാധയെന്ന രീതിയിൽ പ്രചരിച്ചത്​.

ഇയാൾക്ക്​ പുറംവേദനയായിരുന്നുവെന്നും ചികിത്സ നൽകിയെന്നും വിശദീകരിച്ച്​ ആഭ്യന്തര മന്ത്രാലയത്തി​​​​െൻറ ട്വീറ്റ്​ ഉണ്ട്​. ഫർവാനിയ ഒമരിയ ഭാഗത്ത്​ സിഗ്​നലിന്​ സമീപം അവശനായി കിടന്നയാളുടെ വിഡിയോ ആണ്​ പ്രചരിച്ചത്​. ശക്​തമായ മുന്നറിയിപ്പ്​ ഉണ്ടായിട്ടും സാമൂഹിക മാധ്യമങ്ങളിൽ വ്യാജ പ്രചാരണങ്ങൾ ധാരാളമാണ്​. വാർത്തകൾ ആധികാരിക ഉറവിടങ്ങളിൽനിന്നാണെന്ന്​ ഉറപ്പാക്കണമെന്ന്​ അധികൃതർ ആവർത്തിച്ച്​ വ്യക്​തമാക്കിയിട്ടുണ്ട്​.